काठमाडौं । कीर्तिपुर बर्न अस्पतालमा उपचाररत पोखरा महानगरपालिकाका मेयर धनराज आचार्यलाई वार्डमा सरिएको छ । हालसम्म सघन उपचार कक्षमा राखेर उपचार गरिएकोमा सोमबार साँझबाट उनलाई वार्डमा सारिएको हो ।
 
उनको अनुहार र हातमा भएको जलनको घाउ सुधारोन्मोख रहेको अस्पताल निर्देशक डा. किरणकिशोर नकर्मीले जानकारी दिए । उनका अनुसार जलनको घाउ सामान्य हुँदै गए पनि आचार्यलाई पुरानै उच्च रक्तचापको समस्या देखिएको छ । 

“जलनको घाउ खतरामुक्त भए पनि उहाँको रक्तचाप अहिले सन्तुलन नभइरहेकाले अब केही दिन वार्डमा राखेर निगरानी गर्छौं,” डा. नकर्मीले बाह्रखरीसित भने । उनका अनुसार आचार्यको शरीमा गहिरो जलन छैन भने श्वासनली र फोक्सोमा समेत कुनै असर परेको देखिएन । 

यद्यपि संक्रमणको जोखिमलाई ध्यानमा राख्दै अस्पतालले भेटघाट बन्द गरेको छ । पोखरा भ्रमण वर्षको उद्घाटनका क्रममा हाइड्रोजन बेलुन विस्ष्फोट हुँदा अर्थमन्त्री पौडेल र मेयर आचार्य शनिबार घाइते भएका थिए ।