काठमाडौं । उद्घाटन खेलमा लेबनानविरुद्ध ३–१ को जित निकाल्दै म्यानमारले अन्तर्राष्ट्रिय महिला च्याम्पियनसिपमा सुखद सुरुआत गरेको छ ।

सोमबार त्रिपुरेश्वरस्थित दशरथ रंगशालामा भएको खेलमा म्यानमारलाई जित दिलाउन विन थेइन्गी तुम, स्वी यी तुन र सान थव थवले समान एक गोल गरे । लेबनानकी लैला इस्कान्दारले एक गोल फर्काइन् ।

खेलको पहिलो हाफ गोलरहित बराबरीमा समाप्त भए पनि ५७औँ मिनेटमा तुमको गोलमा म्यानमारले अग्रता बनाएको थियो । तर, त्यसको तीन मिनेटपछि इस्कान्दारको गोलमा लेबनान खेलमा फर्कियो ।

७२औँ मिनेटमा तुनको गोलमा म्यानमारले पुनः २–१ को अग्रता बनायो । त्यसको तीन मिनेटपछि नै थवले गोल गरेपछि म्यानमारले ३–१ को अग्रता बनाएको थियो । यसपछि थप गोल नहुँदा म्यानमारले जितसँगै तीन अंक पक्का गरेको हो ।

अखिल नेपाल फुटबल संघ (एन्फा)को आयोजनामा आजदेखि सुरु भएको प्रतियोगितामा कुल चार टिमको सहभागिता छ । जसमा नेपाल, कीर्गिस्तान, म्यानमार र लेबनानको सहभागिता छ ।

प्रतियोगिताको दोस्रो खेलमा आजै नेपाली टिमले कीर्गिस्तानविरद्ध खेल्ने तालिका छ ।