काठमाडौं । नेपाल स्टक एक्सचेन्ज (नेप्से)का निवर्तमान प्रमुख कार्यकारी अधिकृत (सीईओ) कृष्णबहादुर कार्कीको कार्यकाल गत साताको शुक्रबार सकियो । उनको कार्यकाल सकिएसँगै कार्यवाहक सीईओको जिम्मेवारी प्रबन्धक निरञ्जन फुयालले पाएका छन् । तर, नयाँ सीईओ छनोट प्रक्रिया अगाडि नबढाएर अर्थ मन्त्रालय र नेप्से बोर्ड नै शान्त बसेको छ ।

सार्वजनिक संस्थानहरूको कार्यक्षमतामा प्रश्न उठाउने उपप्रधान तथा अर्थमन्त्री विष्णुप्रसाद पौडेलले नेप्सेको नेतृत्व छनोटमा चासो देखाएका छैनन् । नेप्से बोर्ड भने अर्थ मन्त्रालयको ग्रीन सिंग्नल खोजिरहेको छ । तर, अर्थ मन्त्रालयको संस्थान हेर्ने महाशाखा पनि नेप्सेको सीईओ छनोट कसरी गर्ने भन्ने अन्योलमा छ ।

अर्थ मन्त्रालयले नेप्सेको बोर्डलाई अधिकार दिएमा सीईओ छनोट प्रक्रिया अगाडि बढाउने नेप्सेका अध्यक्ष शोभाकान्त पौडेलले बताए । “हामीले अर्थ मन्त्रालयको निर्णय पर्खिएका छौँ । अधिकार दिएमा नेप्से बोर्डले नै सीईओको प्रक्रिया थाल्ने छ,” अध्यक्ष पौडेलले भने, “यसअघि पनि अर्थ मन्त्रालयले नै सीईओ नियुक्तिको प्रक्रिया अगाडि बढाउँथ्यो । योपटक पनि अर्थले नै गर्ला ।”

तर, संस्थानहरूको कार्यकारी प्रमुख नियुक्त गर्ने अधिकार त्यही संस्थाको बोर्डको भएको अर्थ मन्त्रालयका सहसचिव दीर्घराज मैनालीले बताए । तर, अर्थले सीईओ नियुक्त गर भनेर नेप्सेलाई पत्र पठायो भने प्रक्रिया अगाडि बढाउन सक्ने नेप्सेका एक उच्च अधिकारीले बताए । “यसअघि कृष्णबहादुर कार्की सर, चन्द्रसिंह साउद सरको पालामा मन्त्रालयले नै प्रक्रिया अगाडि बढाएको थयो,” ती अधिकारीले भने ।

तर, त्यसपछि सीताराम थपलियाको पालामा नेप्से बोर्डले सीईओ नियुक्त गरिएको ती अधिकारी बताउँछन् । अर्थले आफूलाई अनुकूल हुने हिसाबले काम गर्ने हुँदा सीईओ छनोटको अधिकार नेप्सेलाई नभएको ती अधिकारी बताउँछन् ।

यसअघि नेप्सेको सीईओबाट चन्द्रसिंह साउदले राजीनामा दिएको पाँच महिनापछि मात्र नयाँ सीईओ नियुक्ति गरिएको थियो । साउदले भदौ ८ गते राजीनामा दिएका थिए भने कार्की माघ २० गते नेप्सेको सीईओ नियुक्त भएका थिए ।

कार्कीलाई सीईओ नियुक्त गर्दा अर्थ मन्त्रालयका तत्कालीन सहसचिव रमेश केसीको संयोजकत्वमा सिफारिस समिति गठन भएको थियो । सदस्यमा अर्थ मन्त्रालयकै तत्कालीन सहसचिव रितेश शाक्य र विज्ञ सदस्यामा नेप्सेका पूर्वअध्यक्ष जीवनाथ धिताल थिए ।