काठमाडौं । चलचित्र ‘लाज शरणम्’को गीतमा काठमाडौं महानगरपालिकाका मेयर बालेन शाहले स्वर दिएका छन् । उनको स्वर रहेको गीत ‘लाज शरणम्’ टिमले सोमबार (आज) सार्वजनिक गरेको हो ।

बालेन मेयर भएपछि उनले गाएको गीत सार्वजनिक भएको यो पहिलोपटक हो । मेयर भएपछि उनले हालसम्म कुनै पनि गीत गाएका थिएनन् ।

‘नेपाल हाँसेको...’ बोलको गीतमा बालेनको शब्द, संगीत र स्वर छ । गीतले विकसित नेपालको परिकल्पना गरेको छ ।

‘लाज शरणम्’ले बालेनको स्वरमा रहेको गीतलाई प्रोमोसनल सङ भनेको छ ।

‘लाज शरणम्’का कार्यकारी निर्माता समेत रहेका कलाकार अर्जुन घिमिरे ‘पाँडे’सँग राम्रो सम्बन्ध भएका कारण बालेनले यो चलचित्रका लागि गीत गाएका हुन् । काठमाडौं महानगरपालिकामा मेयरको उमेदवार हुँदा सबैभन्दा पहिला बालेनको पब्लिसिटी अर्जुनले आफ्नो टेलिचलचित्र ‘सक्किगोनि’मार्फत गरिदिएको थिए । ‘सक्किगोनि’को सिजन–२ को ६४ औँ भागमा बालेन विशेष अतिथि कलाकारको रूपमा पुगेका थिए ।

त्यस्तै, काठमाडौं महानगरको मेयरको मतगणनामा अर्जुन बालेनका तर्फबाट मतगणना प्रतिनिधिका रूपमा बसेका थिए । त्यसैले बालेनले अर्जुनको आग्रहलाई नकार्न नसकेका हुन् ।

फागुन १४ गते महाशिवरात्रीको दिन रिलिज हुने चलचित्र ‘लाज शरणम्’ले केही दिनअगाडि मात्रै ‘हेर्दा हेर्दैमा...’ बोलको गीत सार्वजनिक गरेको थियो ।

चलचित्र ‘लाज शरणम्’ हास्य टेलिश्रृंखला ‘सक्किगोनि’को टिमले बनाएको चलचित्र हो । लेखक, कलाकारदेखि निर्देशकसम्म यो चलचित्रमा ‘सक्किगोनि’ टिमको छ ।

‘लाज शरणम्’को मुख्य भूमिकामा सिताराम कट्टेल ‘धर्मुस’ मुख्य भूमिकामा छन् । यो चलचित्रलाई कुमार कट्टेलले निर्देशन गरेका हुन् ।

‘सक्किगोनि’ टिमले बनाएको यो चलचित्रमा धुर्मुससँगै अर्जुन घिमिरे, सागर लम्साल, हरिष निरौला, प्रियाना आचार्य, विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बूलगायत कलाकारको अभिनय छ ।

जेपिटी क्रियसनको ब्यानरमा निर्माण भएको सिनेमामा नवीन श्रेष्ठ निर्माता, राम नरेश शाह र सृजना खड्का सह–निर्माताको रूपमा रहेका छन् ।