काठमाडौं । राष्ट्रिय स्वतन्त्र पार्टी (रास्वपा) संसदीय दलका उपनेता विराजभक्त श्रेष्ठले सामाजिक सञ्जाल विधेयकविरुद्ध मत राखेका छन् । सोमबार प्रतिनिधिसभा बैठकमा उनले सरकारले ल्याएको विधेयक हेर्दा धेरै मान्छे थुन्न जेल बनाइसकेको आभास हुने बताए ।

“सभामुख महोदय, के हामीसँग यति धेरै जेल छन् कि सामाजिक सञ्जाल विधेयकपछिका कसुरदारहरू राख्न सकियोस् । सरकार खुद्रे कुरामा लाखौँ–करोडौँ जरिवानाको मेन्यु ल्याउँदै छ,” सांसद श्रेष्ठले भने, “नागरिकलाई तपाईं बढ्ता बोल्दै हुनुहुन्छ भनेर धम्क्याइरहेको छ । तर, झुटा आश्वासन दिने, भ्रम फैलाउने, असम्भव बाचा गर्नेहरूलाई चाहिँ उन्मुक्ति ! यो विधेयक साँच्चै न्यायका लागि हो कि आलोचकहरूलाई दमन गर्ने सरकारको हतियार मात्र ?”

उनले कानुन सबैका निम्ति भन्ने सिद्धान्त स्वीकार्य भए सत्तामा बसेर झुट बोल्नेलाई कारबाही गरिनुपर्ने बताए । “यदि, कानुन सबैका लागि हो भने शक्ति र सत्ताबाट झुट बोल्नेहरू कारबाहीको पहिलो सूचीमा पर्नुपर्छ,” उनले भने ।

सहिद गंगालाल र धर्मभक्तहरूले लडेर अभिव्यक्ति स्वतन्त्रता ल्याएको भन्दै उनले सरकारले त्यसलाई कुण्ठित गर्न खोजेको बताए । “गंगालाल, धर्मभक्तले लडेको अभिव्यक्ति स्वतन्त्रताको लडाइँ अहिले कुन बयलगाडाको चक्का खुस्किएर अड्किएको हो, मैले बुझ्न सकेको छैन,” उनले भने, “सरकार त्यो बयलगाडाको चक्का लुकाउन खोज्दै छ ।”

उनले नागरिकले कृष्ण सेन ‘इच्छुक’को कविता गुनगुनाइरहेका भन्दै सरकारले ल्याउने ऐनले अभिव्यक्ति स्वतन्त्रता रोक्न नसक्ने बताए । अनि, उनले इच्छुकका कविता सुनाए–
हाम्रा विचारहरूमा प्रतिबन्ध लगाउँदै
हाम्रो ओठहरूमा ताल्चा झुन्ड्याउँदै
तिमी भन्छौ गाउन त गाऊ
तर, यो गीत नगाऊ
हामी भने त्यही गीत गाइरहन्छौँ
जय होस् ।