काठमाडौं । मेटलाइफ फर्च्युन म्यागजिन २०२५ को “विश्वको सबैभन्दा प्रशंसनीय कम्पनीहरू”को सूचीमा पर्न सफल भएको छ । उत्कृष्ट प्रतिष्ठित कम्पनीहरूको वार्षिक प्रतिवेदन कार्डमा आठ जीवन बिमा कम्पनी समावेश गरिएको थियो ।

“मेटलाइफको उद्देश्य हाम्रो रणनीतिक आधारशिला हो, जसले हामीलाई हाम्रा सबै सरोकारवालाहरूका लागि सेवा प्रदान गर्न मार्गदर्शन दिन्छ । यो सम्मानले देखाउँछ कि हाम्रो उद्देश्यप्रति साँचो रहँदा, हामी महत्त्वपूर्ण व्यावसायिक नतिजा प्रदान गर्न सक्छौँ र अझ विश्वस्त भविष्य निर्माण गर्ने हाम्रो परम्परालाई निरन्तर विस्तार गर्न सक्छौँ,” मेटलाइफका अध्यक्ष र सीईओ मिशेल खलाफले भने ।

पछिल्ला २५ वर्षभन्दा बढी समयदेखि, फर्च्युन र कर्न फेरिले सहकार्य गर्दै कर्पोरेट प्रतिष्ठाका आधारमा कम्पनीहरूको पहिचान र मूल्यांकन गर्दै आएका छन् । तीन हजारभन्दा बढी शीर्ष कार्यकारीहरू, निर्देशकहरू र वित्तीय क्षेत्रका सदस्यहरूलाई आफ्नै उद्योगका प्रतिष्ठानहरूलाई नौ विशेषताका आधारमा मूल्यांकन गर्न भनिन्छ । यी विशेषताहरूमा नवीनता, दीर्घकालीन लगानी मूल्य, वित्तीय स्थायित्व, र प्रतिभा आकर्षित तथा कायम राख्ने क्षमता जस्ता तत्वहरू समावेश छन् ।