काठमाडौं । काठमाडौंमा डिउटीमा खटिएका प्रहरी कर्मचारीमाथि कुटपिट गर्ने सबै युवा अझै पक्राउ परेका छैनन् । बिहीबार (माघ २४) राति करिब १२ बजे ठमेलको छाया सेन्टरनजिकै प्रहरीको क्विक रेस्पोन्स टिम (क्यूआरटी)का रूपमा मोटरसाइकलसहित खटिएका दुई प्रहरीमाथि कुटपिट गरिएको थियो ।

घटनाको तीन दिनसम्म पनि कुटपिट गर्ने केही युवा प्रहरी नियन्त्रणबाहिर छन् । आफूलाई प्रधानमन्त्री केपी शर्मा ओलीनिकट भनेर धम्की दिँदै उनीहरूले क्यूआरटीका रूपमा खटिएका प्रहरी वृत्त दरबारमार्गका प्रहरी हवल्दार जुगलाल घर्ती र प्रहरी जवान नगेन्द्रराज विष्टमाथि कुटपिट गरेका थिए ।

कुटपिटबाट प्रहरी हवल्दार घर्तीको टाउको र छाती र जवान विष्टको दायाँ आँखामुनि चोट लागेको थियो । उनीहरूमाथि ६/७ जनाको समूहमा रहेका युवाले कुटपिट गरेका थिए । डिउटीमा खटिएका प्रहरीमाथि कुटपिट गरिनुलाई गम्भीर सुरक्षा चुनौतीका रूपमा प्रहरी अधिकारी अर्थ्याउँछन् ।

आरोपितलाई अझैसम्म नियन्त्रणमा लिन नसक्दा प्रहरीको भूमिकामाथि नै प्रश्न उठाइँदै छ । त्यसो त त्यहाँ घाइते भएका प्रहरीले आक्रमणपछि तुरुन्त कार्यालयमा जानकारी गराउँदा समेत थप मद्दतको टोली समयमा घटनास्थलमा नआइपुगेको गुनासो गरेका छन् ।

घाइते प्रहरीले भनेका छन्, ‘‘हामी दुईजना मात्रै र कुटपिट गर्ने समूह ६/७ जना हुँदा नियन्त्रण गर्न सकेनौँ । हामीले तत्काल कार्यालमा आफूहरू कुटिएको जानकारी गराएका थियौँ । तर, थप मद्दतको टोली समयमा आउन नसक्दा उनीहरू भाग्न सफल भए ।’’

जिल्ला प्रहरी परिसर काठमाडौंका एक अधिकारीले पनि थप टोली तत्काल घटनास्थलमा पुग्न नसक्दा आक्रमणकारी भाग्न सफल भएको स्वीकार गरे । परिसरका प्रवक्ता एवं एसपी अपीलराज बोहरा भने उक्त कुटपिटको सूचना पाउनासाथ प्रहरी टोली आक्रमणकारीको खोजीमा लागेको जिकिर गर्छन् ।

उनले भने, ‘‘कुटपिट हुँदासाथ थप टोली घटनास्थल पुगेको थियो । तर, उनीहरू भागेर विद्यार्थी बस्ने होस्टेलभित्र छिरेका कारण प्रहरीको टोली फर्किएको हो ।’’

घटनास्थल दरबारमार्ग प्रहरी वृत्तको क्षेत्रभित्र पर्छ । नजिकै प्रहरी वृत्त सोह्रखुट्टे समेत छ । तर, दुवै कार्यालयका प्रहरी तत्काल नपुग्दा आक्रमणकारी भाग्न सफल भएका हुन् ।

हरेक प्रहरी युनिटमा तत्काल घटनास्थलमा जानुपर्ने अवस्थाका निम्ति सीआरभी भ्यान हुन्छ । २४ घण्टा नै त्यो तयारी अवस्थामा राखिएको हुन्छ । तर, आफ्नै प्रहरी कर्मचारीमाथि कुटपिट हुँदा दरबारमार्ग र सोह्रखुट्टेको टोली समयमै घटनास्थलमा पुगेनन् ।

प्रहरीका अनुसार, घटनामा अमृत साइन्स (अस्कल) क्याम्पसमा अध्ययनरत विद्यार्थीको संलग्नता देखिएको छ । प्रहरीले सीसीटीभी फुटेजको अध्ययन गरी अनुसन्धान थालेको छ ।

एसपी बोहराका अनुसार, आइतबार (माघ २७) भने घटनामा संलग्न दुईजनालाई पक्राउ गरिएको छ । प्रहरीमाथि कुटपिट गर्ने दिनेश सिग्देल र रशेम फुलरालाई पक्राउ गरिएको प्रहरीले जनाएको छ । आक्रमणमा संलग्न अरू व्यक्तिको खोजी जारी छ ।