काठमाडौं । उत्पादन अनुज्ञापत्र तथा बिक्री वितरण दर्ता प्रमाणपत्र रद्द गरिएको उद्योगले औषधि उत्पादन गरी बजारमा पठाएको पाइएको छ । डेढ वर्षअघि नै औषधि व्यवस्था विभागले लाइसेन्स रद्द गरेको उद्योगले औषधि उत्पादन गरी बिक्री वितरण गरेको पाइएको हो । 

चाँगुनारायण ३ झौखेलस्थित एमडीएच फार्मास्युटिकल्स प्रालिले कानुनविपरीत यस्तो कार्य गरेको हो । सो कम्पनीले ‘फर्टिभेट’ नामक क्लोमिफिन साइट्रेट ट्याब्लेट उत्पादन गरी अन्तिमपटक गत डिसेम्बरमा बजारमा पठाएको पाइएको छ ।
 
विभागले सो कम्पनीको उत्पादन अनुज्ञापत्र तथा बिक्री वितरण दर्ता प्रमाणपत्र ०८० भदौ १८ गते रद्द गरेको थियो । त्यसयता पनि कम्पनीले पटकपटक गरी तीनवटा ब्याचमा सोही औषधि उत्पादन गरी बजारमा पठाएको विभागले जनाएको छ । 

ती औषधि बिक्री–वितरण नगर्न तथा बजारबाट फिर्ता ल्याई सोको विवरण बुझाउन विभागले उत्पादक कम्पनीलाई निर्देशन दिएको छ । उक्त औषधि सिफारिस र प्रयोग समेत नगर्न विभागले सबैमा आग्रह गरेको छ ।