काठमाडौं । बंगलादेशकी पूर्वप्रधानमन्त्री शेख हसिना पछिल्लो ६ महिनादेखि भारतमा शरण लिएकी छन् । हसिनाले सामाजिक सञ्जाल प्रयोग गरेकोमा बंगलादेशले भारत सरकारसमक्ष कडा आपत्ति जनाएको छ ।

यस सम्बन्धमा बंगलादेशको विदेश मन्त्रालयले सामाजिक सञ्जाल फेसबुकमार्फत एक विज्ञप्ति जारी गरेको हो ।

पोस्टमा भनिएको छ, "बंगलादेशको परराष्ट्र मन्त्रालयले बंगलादेशमा अस्थिरता भड्काउनका लागि सामाजिक सञ्जाललगायत विभिन्न प्लेटफर्ममा पूर्वप्रधानमन्त्री शेख हसिनाले गरेको लगातार झुटो र मनगढन्ते टिप्पणी र बयानप्रति भारत सरकारसँग कडा आपत्ति जनाएको छ ।"

ढाकास्थित भारतका कार्यवाहक उच्चायुक्तलाई बुझाएको विरोध पत्रमार्फत मन्त्रालयले बंगलादेशका जनताको भावनामा चोट पुर्‍याउने भएकाले गहिरो चिन्ता, निराशा र गम्भीर आपत्ति प्रकट गरेको जनाएको छ ।

"शेख हसिनाको त्यस्ता गतिविधिलाई बंगलादेशप्रति शत्रुतापूर्ण कार्य मानिन्छ र दुई देशबीचको राम्रो सम्बन्ध स्थापना गर्ने प्रयासका लागि फाइदाजनक छैन," विज्ञप्तिमा भनिएको छ ।