काठमाडौं । उपप्रधान एवं अर्थमन्त्री विष्णुप्रसाद पौडेलले सरकार नीतिगत समाधानसहित पुँजीगत खर्च गर्ने क्षमतामा वृद्धि गर्ने तयारीमा रहेको बताएका छन् ।

बिहीबार अर्थ मन्त्रालयमा बजेटको अर्धवार्षिक समीक्षापछि पत्रकार सम्मेलन गर्दै अर्थमन्त्री पौडेलले यस्तो बताएका हुन् । उनले वर्तमान सरकार गठन भएसँगै ओरालो लाग्दै गरेको अर्थतन्त्रलाई सुधार गर्दै उकालो लगाउने काम गरेको दाबी गरे । पछिल्ला सार्वजनिक अर्थतन्त्रका समग्र परिसूचकहरूले समेत बताइरहेको उल्लेख गरे ।

उनले सरकारको कार्यक्षमताको आधारमा वर्तमान सरकार सापेक्ष रूपमा सक्षम रहेको पनि बताए । अर्थतन्त्र सुधारको लागि थालेका प्रयासहरूलाई सरकारले तीव्रता दिने र छिटो नतिजा प्राप्त गर्ने काममा लाग्ने धारणा राखे । अर्थमन्त्री पौडेलले सरकारले दुईतिहाइ भन्ने विषयमा ध्यान नदिएर राम्रो काम गर्ने संकल्पमा रहेको उल्लेख गरे ।

आयातबाट जोगिएर वा अलग भएर राजस्व, आर्थिक र समग्र मागमा वृद्धि गर्न नसकिने उल्लेख गरे । राजस्व संकलनमा गत वर्षको तुलनामा प्रगति गरेको भन्दै अझै तीव्रता दिने बताए ।

"वर्तमान सरकार गठन भएसँगै ओरालो लाग्दै गरेको अर्थतन्त्रलाई सुधार गर्दै उकालो लगाउने काम गरेको छ । अर्थ मन्त्रालयले जारी गरेका समग्र परिसूचकहरूले बताइरहेका छन् । सरकारको कार्यक्षमताको आधारमा वर्तमान सरकार सापेक्ष रूपमा सक्षम छ । अर्थतन्त्र सुधारको लागि थालेका प्रयासहरूलाई तीव्रता दिने छिटो नतिजा प्राप्त गर्ने कुरामा ध्यान दिनुपर्ने आवश्यकता छ । दुईतिहाइ भन्ने विषयमा ध्यान दिएका छैनौँ । सरकारले जति काम गरेको छ राम्रो गरेको छ । अझै राम्रो काम गर्ने संकल्प राखेको छ," उनले भने ।  

अर्थमन्त्री पौडेलले सम्पत्ति शुद्धीकरणको ग्रे लिस्टमा पर्ने विषयमा एक प्रकारको परीक्षा सकिएको बताए ।