काठमाडौं । पूर्वप्रधानमन्त्रीसमेत रहेका प्रमुख प्रतिपक्षी दलका नेता पुष्पकमल दाहाल 'प्रचण्ड'ले नेपाली कांग्रेसका नेताहरू शेखर कोइराला र गगन थापामाथि प्रश्न उठाएका छन् । बिहीबार प्रतिनिधसभाको बैठकमा प्रचण्डले शेखर–गगन समूहले विगतमा निर्वाचनपूर्व गठबन्धन गर्न नहुने धारणा राखेको विषयमा प्रश्न उठाएका हुन् ।

“कांग्रेसका केही साथीहरूले निर्वाचनपूर्वको गठबन्धन अपराध हो झैँ गर्नुभएको थियो । अब रुखबाहेक कहीँ पनि भोट हालिने छैन भनेको त्यो प्रतिबद्धता कहाँ गयो ?,” प्रचण्डले भने, “स्थानीय तहको उपचुनावमा दुई ठूला पार्टीहरूले गठबन्धन गर्नुभयो हैन ? अझ तपाईंहरूले चुनाव चिह्न भाडामा लगाउन पनि भ्याउनुभयो होइन ?”

०७९ सालमा कांग्रेस र माओवादी गठबन्धनमा चुनावमा जानुअघि नेता कोइराला र महामन्त्री थापा समूहले निर्वाचनपूर्व गठबन्धन गर्न नहुने धारणा राखेका थिए । उनीहरूको धारणालाई सम्बोधन हुने गरी कांग्रेसले स्थानीय चुनावअघि स्थानीय तहले नै निर्णय गर्ने गरी आवश्यकता र औचित्यका आधारमा गठबन्धन गर्ने निर्णय गरेको थियो । तर, पछि त्यही निर्णयमा टेकेर केन्द्रबाटै गठबन्धन गरेर दुईए पार्टी चुनावमा गएका थिए ।