काठमाडौं । तालिबानका उपविदेशमन्त्री शेर मोहम्मद अब्बास स्तानिकजईले देश छाडेका छन् । स्तानिकजाईले अफगानिस्तानमा छात्राहरूको शिक्षामा प्रतिबन्ध लगाउने तालिबानको निर्णयको आलोचना गरेपछि उनलाई देश छाड्न बाध्य पारिएको अन्तर्राष्ट्रिय सञ्चारमाध्यमले जनाएका छन् । 

स्तानिकजाईको अभिव्यक्तिबाट आक्रोशित बनेका तालिबान प्रमुख हिबतुल्लाह अखुन्दजादाले पक्राउ गर्ने आदेश दिएपछि उनी अफगानिस्तान छाडेर यूएई गएको भारतीय सञ्चारमाध्यमले जनाएका छन् ।

तालिबानले अफगानी छात्राहरूलाई माध्यमिक र उच्च शिक्षामा प्रतिबन्ध लगाएको छ । यसबारे जनवरी २० मा पाकिस्तान सीमानजिकै रहेको खोस्ट प्रान्तमा आयोजित एक समारोहमा स्तानिकजाईले पैगम्बर मुहम्मदको समयमा पनि पुरुष र महिला दुवैका लागि शिक्षा खुला रहेको बताएका थिए । उनले दुई करोड जनतामाथि आफूहरूले अन्याय गरिरहेको पनि बताएका थिए ।

स्टानिकजाई अफगानिस्तानको लोगर प्रान्तको बाराकी बराक जिल्लाका हुन् । सन् १९६३ मा जन्मेका उनी तालिबान लडाकुहरू जस्तै पस्तुन हुन् । राजनीतिशास्त्रमा स्नातकोत्तर पूरा गरेपछि उनले भारतको देहरादुनको भारतीय सैन्य एकेडेमीमा तालिम लिए ।

भारतमा तालिम पूरा गरेपछि उनी अफगान सेनामा भर्ती भएका थिए । सोभियत संघ–अफगानिस्तान युद्धको समयमा उनी अफगान सेनामा थिए । सन् १९९६ मा उनले अफगान सेना छोडे । त्यतिबेला अफगानिस्तानमा तालिबान सत्तामा आएको थियो । जागिर छोडेपछि उनी तालिबानमा सामेल भए ।

तालिबानले गत डिसेम्बरमा महिलाहरूलाई नर्सिङ तालिममा पनि प्रतिबन्ध लगाएको थियो । समाचार एजेन्सी एएफपीका अनुसार, गत डिसेम्बरमा काबुलमा भएको स्वास्थ्य अधिकारीहरूको बैठकमा तालिबान सरकारको निर्णयको घोषणा गरिएको थियो ।