काठमाडौं । कुशल गायन कलाले स्रोताको मन जितेका ६९ वर्षीय उदितनारायण झा यति बेला सामाजिक सञ्जालमा चर्चाको विषय बनेका छन् । उनीसँग सम्बन्धित एउटा भिडियो ‘भाइरल’ भइरहेको छ । यो भिडियो एक कन्सर्टको भएको बताइएको छ । 

कन्सर्टमा उनको सुपरहिट गीत ‘टिप टिप वर्षा पानी’ गाउँदै गर्दा एक महिला फ्यान सेल्फी खिच्ने उद्देश्यले उदितनजिकै पुग्छिन् । महिला फ्यानले सेल्फी लिएपछि उदितको गालामा चुम्बन गर्छिन् । त्यसपछि उदितले महिला फ्यानको ओठमा चुम्बन गरिदिन्छन् ।

त्यसैक्रममा उनले केही अरू महिला फ्यानलाई अँगालो हालेर गालामा चुम्बन गरेको पनि देख्न सकिन्छ । 

त्यही भिडियो क्लिप भाइरल भएपछि सामाजिक सञ्जाल प्रयोगकर्ताले आक्रोश व्यक्त गरेका छन् । केही प्रयोगकर्ताले उनको समर्थनमा पनि लेखेका छन् ।

हिन्दुस्तान टाइम्ससँग कुरा गर्दै उदितनारायणले यसबारे स्पष्टीकरण दिएका छन् । उनले भनेका छन्, “फ्यानहरू धेरै क्रेजी हुन्छन्, हैन र ? हामी त्यस्तो छैनौँ । हामी सभ्य मानिस हौँ । कोहीकोहीले यसलाई बढावा दिन्छन् र यसको माध्यमबाट आफ्नो प्रेम देखाउँछन् ।”

फ्यानहरू कलाकारसँग नजिकिन खोज्नु र माया दर्साउनुलाई सामान्य रूपमा लिनुपर्ने उनको धारणा छ । “फ्यानहरूलाई भेट्ने मौका यही हो भन्ने लाग्छ । त्यसैले कोही हात मिलाउन हात फैलाउँछन्, कोही हात मिलाउँछन् । यसमा धेरै ध्यान दिनु हुँदैन,” उनले भनेका छन् ।

उदितले स्टेजमा कसैलाई चुम्बन गरेको यो पहिलोपटक भने होइन । यसअघि पनि उनको नाम यस्तो विवादमा आउने गरेको थियो । उदितको अर्को एक पुरानो भिडियो पनि हाल ‘भाइरल’ भइरहेको छ ।

उक्त भिडियोमा उदितले गायिका श्रेया घोषाललाई चुम्बन गरेको देखिन्छ । उदितले श्रेयालाई स्टेजमा अवार्ड दिन्छन् र अचानक उनको गालामा चुम्बन गरेको उक्त पुरानो भिडियोमा देखिन्छ ।

भिडियोमा श्रेयाको बडी ल्यांग्वेज हेर्दा उनले यस्तो अपेक्षा गरेकी थिइनन् । उदितले चुम्बन गरेपछि उनी छक्क पर्छिन् ।

उदितनारायण र अल्का याग्निकलाई बलिउड संगीत उद्योगको हिट ‘जोडी’ मानिन्छ । यी दुवैले ९० को दशकदेखि नै थुप्रै सुपरहिट गीत दिएका छन्, जसलाई आज पनि धेरैले गुनगुनाइरहेका छन् ।

रियालिटी शोका क्रममा यी दुईबीच प्रायः हाँसोठट्टा भइरहेको हुन्छ । उदितले अल्काको गालामा चुम्बन गरेको भिडियो पनि सामाजिक सञ्जालमा भाइरल भइरहेको छ ।

भिडियोमा अलका एक गायन रियालिटी शोको स्टेजमा गाइरहेकी हुन्छिन्, ठिक त्यही समय उदित उनको नजिक पुगेर गालामा चुम्बन गर्छन् ।

लहरे रेट्रोसँग कुरा गर्दै उदितनारायणले यसबारे भनेका थिए, “जसरी एक गायिकाको अर्को गायकसँग सम्बन्ध हुन्छ, मेरो अल्काजीसँग पनि त्यस्तै सम्बन्ध हुन्छ । तर, जब अल्काजी मलाई भेट्छिन्, म उनीसँग ठट्टा गरिरहन्छु । म उनीमाथि व्यंग्य गरिरहन्छु ।” बीबीसी हिन्दीबाट ।