काठमाडौं । राष्ट्रियसभा सदस्य वामदेव गौतमले अध्यादेश जारी गर्दा प्रतिपक्षलाई पनि साथमा लिनु राम्रो हुने बताएका छन् । आइतबार राष्ट्रियसभा बैठकमा उनले यस्तो बताएका हुन् ।

हाल अध्यादेशले राजनीतिक माहोल तातेको भन्दै उनले यो मुख्यतः सत्ताधारी शक्तिलाई सकारात्मक सहयोग पुग्ने गरी निर्माण गरिएको संवैधानिक संरचना भएको उल्लेख गरे । उनले के कति संख्यामा अध्यादेश जारी गर्न सकिन्छ भन्ने विषयमा कुनै बार, बन्देज संविधानमा नरहेको बताए ।

नेपालमा समाजवाद निर्माण गर्न सकिने र त्यसको निम्ति समय तोकेर जिम्मेवारी दिए आफूले पूरा गर्ने उनले सुनाए । त्यो पूरा नगरेको खण्डमा मृत्युदण्डका निम्ति आफू तयार रहेको उनको भनाइ थियो ।

राष्ट्रियसभामा वामेदव गौतमको भनाइ पढ्नोस्–
अहिले केही समयदेखि अध्यादेश राजनीतिक माहोल बनेको छ । म अध्यादेश पक्षधर पनि होइन, विपक्षमा पनि लागेको छैन । यसको सैद्धान्तिक थाहा छ । अध्यादेश मुख्यतः राज्य सञ्चालन, सत्ताधारी शक्तिलाई सकारात्मक सहयोग पुग्ने गरी निर्माण गरिएको संवैधानिक संरचना हो । तर, प्रजातान्त्रिक परिपाटी उल्लंघन नहोस् भनेर अध्यादेश जारी गर्न धेरै सर्तहरू पूरा गर्नुपर्छ । संविधानबमोजिम के कति संख्यामा अध्यादेश जारी गर्न सकिन्छ भन्ने विषयमा कुनै बार, बन्देज संविधानमा छैन । तर, यो नानीबाबुहरूले घर पुतली खेलेजस्तो विषय पनि होइन । अध्यादेश जारी गर्दा प्रतिपक्षलाई पनि साथ लिनु राम्रो संस्कार मानिन्छ । तर, यो सत्ताधारी पक्ष, विपक्षका बीच रहेको व्यवहारमा भर पर्छ । यस्ता विषयमा सदनको समय धेरै खर्च गर्नु उचित मानिँदैन । अहिले मुख्यतः हाम्रो राष्ट्रलाई चाहिएको विषय हो, लोकतान्त्रिक मूल्य–मान्यतामा आधारित समृद्ध समाजवाद । यसमा कसैको ध्यान छैन । न सत्ता पक्ष न प्रमुख प्रतिपक्ष, न प्रतिपक्षको । यो संरचना निर्माण गर्न सकिन्छ । समाजवाद निर्माण गर्न सकिन्छ । समाजवादको संरचना निर्माण गर्न सकिन्छ । म आफूलाई दाउमा राख्न चाहन्छु । मलाई मृत्युदण्ड दिइयोस्, यदि समाजवाद निर्माण हुन सक्दैन भने । वर्ष तोकियोस्, यति वर्षभित्रमा समाजवाद निर्माण गर्न सकिएन भने म मृत्युदण्डमा जान तयार छु । न्युज एजेन्सी नेपालबाट ।