काठमाडौं । नेपाली कांग्रेस संसदीय दलको बैठकमा संघीय संसद्को अबको निर्वाचन स्थानीय तहको भन्दा पहिला गर्न माग गरिएको छ । संसद् भवनस्थित ल्होत्से हलमा शुक्रबार बसेको कांग्रेस संसदीय दलको बैठकमा सांसदहरूले संघको निर्वाचन स्थानीय तहको भन्दा पहिला गर्ने गरी आवश्यक व्यवस्था मिलाउन माग गरेका हुन् ।

बैठकपछि सञ्चारकर्मीसँग कांग्रेसका प्रमुख सचेतक श्यामकुमार घिमिरेले स्थानीय तहको भन्दा आमनिर्वाचन अगाडि गर्ने व्यवस्था मिलाउन सांसदहरूले माग गरेको जानकारी दिए । आज सांसदहरूले बोल्ने क्रम सकिएको उनले बताए ।

कांग्रेसतर्फका मन्त्री र पार्टीका पदाधिकारीहरूले बोल्न बाँकी रहेकाले यही माघ २४ गते पुनः संसदीय दलको बैठक बस्ने उनले जानकारी दिए ।

बैठकमा सांसदहरूले सरकारले ल्याएको अध्यादेश, आफ्नो क्षेत्रका विकास निर्माणका विषय उठाएको उनले बताए । बैठकमा पाथीभरा केबलकारका विषयमा पनि सम्बन्धित जिल्लाका सांसदले आफ्ना धारणा राखेका उनले जानकारी दिए ।

श्याम घिमिरेको भनाइ पढ्नोस्–
नेपाली कांग्रेसको संसदीय दलको बैठक आज सक्ने गरी हामीले बोलाएका थियौँ । तर, बोल्ने वक्ताहरूको क्रम लामो भएकाले आज पनि बैठक सकेनौँ । सांसदहरूको बोल्ने क्रम सकिएको छ । अब मन्त्रीहरू, पदाधिकारीहरू र नेताहरूले बोल्ने क्रम बाँकी छ । यो संसद्को बैठक २४ गते हुन्छ । त्यही दिन बिहान साढे ८ बजेदेखि बस्ने गरी बैठकलाई स्थगन गरिएको छ । अध्यादेशको विषयमा मान्य सदस्यहरूले कुरा उठाउनुभएको छ । आफ्नो क्षेत्र, विकास निर्माणका कुराहरू उठाउनुभएको छ । सम्बन्धित जिल्लाका मान्य सदस्यहरूले पाथीभराको केबलकारका विषयमा जुन किसिमको द्वन्द्व भइरहेको छ, त्यसमा पनि प्रश्न उठाउनुभयो । त्यसमा गृहमन्त्रीज्यूले संसदीय मामिला मन्त्रालयअन्तर्गत पर्दो रहेछ, उहाँले संसदीय मामिला मन्त्रालयको सचिव बोलाएर वार्ता समिति बनाएर वार्ता गरेर सकारात्मक ढंगबाट टुंग्याउन निर्देशन दिएको बताउनुभयो । आजको बैठकमा आगामी निर्वाचन स्थानीय तहको निर्वाचनभन्दा अगाडि आमनिर्वाचन गर्ने व्यवस्था मिलाउन सांसदहरूले जोडदार माग उठाउनुभएको छ । न्युज एजेन्सी नेपालबाट ।