
काठमाडौं । नेकपा (एमाले)का सांसद योगेश भट्टराईले ‘अध्यादेशबाट जन्मिएको’ पार्टीले अध्यादेशकै विरोध गर्नु अचम्मलाग्दो भएको टिप्पणी गरेका छन् । शुक्रबार प्रतिनिधिसभा बैठकमा उनले सरकारले ल्याएको अध्यादेशको बचाउ गर्ने क्रममा नेकपा (एकीकृत समाजवादी)प्रति लक्षित गर्दै यस्तो टिप्पणी गरेका हुन् ।
माधवकुमार नेपाल नेतृत्वको एकीकृत समाजवादीले अध्यादेशको विरोध गर्दै आएको छ । “अध्यादेशबाट जन्मिएको पार्टी अध्यादेश ठिक छैन भनिरहेको छ, के हुन लागेको हो यो नेपालमा ! अचम्म लागिरहेको छ,” भट्टराईले भने ।
उनले ०७८ साल भदौ २ गते अध्यादेशकै कारण एमाले विभाजन भएको स्मरण गरे । प्रेम सुवाल र योगेन्द्र मण्डलबाहेक अरू सांसद र दलले अध्यादेशको प्रक्रियाका विषयमा विमति राख्नु नौटंकी भएको बताए । अध्यादेशको प्रक्रियामा अरू सांसद र दल अछुतो नरहेको उनको भनाइ थियो ।