काठमाडौं । अमेरिकामा दुर्घटना भएको विमानको ‘ब्ल्याक बक्स’ भेटिएको छ । खोजीकार्यका क्रममा ब्ल्याक बक्स भनिने विमानको फ्लाइट डाटा रेकर्डर र ककपिट भ्वाइस रेकर्डर फेला परेको अधिकारीहरूले बताएका छन् ।

बीबीसीको अमेरिकीसम्बद्ध संस्था सीबीएस न्युजलाई एक स्रोतले यो जानकारी दिएको हो । ब्ल्याक बक्समार्फत यो समस्या वास्तवमा कहाँ भयो पत्ता लगाउन सम्भव हुनेछ ।

सीबीएसका अनुसार, राष्ट्रिय यातायात सुरक्षा बोर्डको प्रयोगशालामा ब्ल्याक बक्स जाँच गरिनेछ ।

• अमेरिकी विमान दुर्घटनाबारे ट्रम्पले लगाए यस्तो गम्भीर आरोप

स्थानीय समयानुसार बुधबार राति करिब ९ बजे अमेरिकी एयरलाइन्सको विमान वासिङटन डीसीनजिकै आकाशमा ब्ल्याक हक हेलिकोप्टरसँग ठोक्किएको थियो । दुर्घटनामा विमानमा सवार सबै ६४ जनाको मृत्यु भएको जनाइएको छ ।

बम्बार्डियर कम्पनीको यो सीआरजे ७०० विमान कन्सासबाट वासिङटनतर्फ जाँदै थियो ।

अमेरिकी सञ्चारमाध्यमका अनुसार, उक्त ठक्करपछि विमान आकाशमा दुई टुक्रा भई पोटोमाक नदीमा खसेको थियो । त्यसपछि नदीमा खोजी तथा उद्धार कार्य सुरु गरिएको थियो । बीबीसीबाट ।