काठमाडौं । अमेरिकी राष्ट्रपति डोनाल्ड ट्रम्पले भारतीय प्रधानमन्त्री नरेन्द्र मोदीसँगको कुराकानी निकै अर्थपूर्ण भएको बताएका छन् । सोमबार दुई नेताबीच फोनवार्ता भएको थियो ।

ह्वाइट हाउसले जारी गरेको विज्ञप्तिमा दुई नेताबीच अमेरिका र भारतबीचको सहयोगलाई सुदृढ र विस्तार गर्ने विषयमा वार्ता भएको उल्लेख छ ।

इन्डो–प्यासिफिक, मध्यपूर्व र युरोपको पछिल्लो अवस्थाबारे छलफल भएको बताइएको छ । भारतले अमेरिकामा बनेका सुरक्षा उपकरण किन्ने विषयलाई ट्रम्पले जोड दिएका बताइएको छ । आपसी हितका व्यापारिक विषयमा पनि छलफल भएको बताइएको छ । 

यसअघि प्रधानमन्त्री नरेन्द्र मोदीले ट्रम्पसँग फोनमा कुरा गरेको पुष्टि गरेका थिए ।

उनले सामाजिक सञ्जाल एक्समा लेखे , “मेरा प्रिय मित्र अमेरिकी राष्ट्रपति डोनाल्ड ट्रम्पसँग कुरा गर्न पाउँदा खुसी लाग्यो । उनको दोस्रो कार्यकालको ऐतिहासिक कार्यकालको शुभकामना । हामी पारस्परिक रूपमा लाभदायक र विश्वसनीय साझेदारीका लागि प्रतिबद्ध छौँ । हामी हाम्रा जनताको हित र विश्व शान्ति, समृद्धि र सुरक्षाका लागि मिलेर काम गर्नेछौँ ।”

यसअघि, ट्रम्पले शपथ लिएको एक दिनपछि भारतीय विदेशमन्त्री एस जयशंकरले अमेरिकी विदेशमन्त्री मार्को रुबियोसँग कुराकानी गरेका थिए । मार्को रुबियोले अमेरिका भारतसँग आर्थिक मोर्चामा काम गर्न इच्छुक रहेको बताएका थिए ।

शुक्रबार भारतीय विदेश मन्त्रालयका प्रवक्ताले भारतले अमेरिकासँग राम्रो र बलियो सम्बन्ध स्थापनाका लागि प्रयास गर्ने बताएका थिए । बीबीसी