काठमाडौं । भारतमा हालै आयोजित पहिलो संस्करणको खो–खो विश्वकपमा नेपालका महिला र पुरुष दुवै टिम उपविजेता बने । तर, नेपालले कुनै नगद पुरस्कार पाएको छैन । पाउने/नपाउने पनि टुंगो छैन ।

यही जनवरी १३ देखि १९ सम्म आयोजित प्रतियोगितामा नेपालका दुवै टिमले फाइनलमा भारतसँग पराजय व्यहोरेपछि उपविजेतामा चित्त बुझाएका थिए । विश्व खेलकुदको उदाहरण हेर्ने हो भने विश्वकपमा कम्तीमा विजेता र उपविजेतालाई नगद पुरस्कारको व्यवस्था हुन्छ ।

खो–खो विश्वकपको उपविजेता बने पनि नगद पुरस्कार पाउने/नपाउने निश्चित नभएको नेपाल खो–खो संघका महासचिव शंकर महर्जनले बताए । आयोजकसँग खेलाडीहरूलाई प्रोत्साहन गर्न भए पनि केही नगद पुरस्कार हुनुपर्ने माग नेपालले राखेको उनले जानकारी दिए ।

“यो सबै कुरा गुमराहमा राखिरहेका छन् । नगद पुरस्कार छैन पनि भनेका छैनन्, नगद पुरस्कार यति दिन्छौँ पनि भनेका छैनन् । हामीले आयोजकलाई प्रतियोगिता आयोजना गरेपछि खेलाडीहरूलाई प्रोत्साहन गर्न भने पनि नगद पुरस्कार हुनुपर्छ भनेका छौँ । हुन्छ जस्तो कुरा गर्छन् । अब कसरी आउँछ, त्यो हेर्न बाँकी नै छ,” महासचिव महर्जनले बाह्रखरीसँग भने । 

भारतीय सञ्चारमाध्यमले खो–खो विश्वकपमा नगद पुरस्कारको व्यवस्था नभएको खुलाएका छन् । उक्त विश्वकपमा विजेता र उपविजेतालाई ट्रफी, मेडल र अरू सम्मान भए पनि नगद पुरस्कार नदिइएको भारतीय सञ्चारमाध्यमले जनाएका छन् ।