रामल्ला । गाजामा भग्नावशेष हटाउन पाँच वर्षसम्म लाग्ने प्यालेस्टाइनी अधिकारीले बताएका छन् । पर्याप्त रकम र उपकरण उपलब्ध भएमा इजरायलसँगको द्वन्द्वका क्रममा गाजामा रहेको भग्नावशेष हटाउन तीनदेखि पाँच वर्ष लाग्न सक्ने प्यालेस्टाइनी सार्वजनिक संरचना निर्माण तथा आवासमन्त्री अहेद बिसिसोले बताएका हुन् ।

विस्फोटक पदार्थ पत्ता लगाउन स्रोत, कोष र विशेष उपकरण सुरक्षित गर्न र भग्नावशेष उठाउन, सामान छुट्ट्याउन र ढुवानी गर्न तीनदेखि पाँच वर्ष लाग्न सक्ने अनुमान गरिएको बिसिसोले प्यालेस्टाइनी समाचार संस्था (वाफा)सँग बताएका छन् ।

उनले संयुक्त राष्ट्रसंघीय विकास कार्यक्रम (यूएनडीपी)लगायत विभिन्न संस्थासँग सडक खुलाउने र भग्नावशेष हटाउने प्रक्रियामा समन्वयका निम्ति आफ्नो मन्त्रालयले काम गरिरहेको उल्लेख गरे ।

अर्को चरणमा विद्यालय, अस्पताल र मस्जिदसहित १५० सार्वजनिक भवनको भग्नावशेष हटाउने र सडक पुनः सञ्चालन गर्ने विषयमा केन्द्रित हुने बिसिसोले बताए ।

“पेस गरेको दुई करोड ५० लाख क्षतिको स्थानीय बासिन्दाले पेस गरेको प्रतिवेदनमा आधारित विस्तृत अध्ययन पूरा भएको छ,” बिसिसोले भने ।

वेस्ट बैंक र गाजा दुवैको स्थितिलाई सम्बोधन गर्न एउटा कार्यदल स्थापना गरिएको छ । बिसिसोले भने, “प्रारम्भिक जानकारीअनुसार इजरायली आक्रमणका कारण लगभग चार लाख आवासीय एकाइ पूर्ण वा आंशिक रूपमा नष्ट भएका छन् । दाताहरूको समन्वयमा दुई लाख नयाँ एकाइको निर्माण गर्नुपर्ने आवश्यकता देखिएको छ ।”

आंशिक रूपमा क्षति भएका घरहरूको मर्मतसम्भार गर्न र घर पूर्ण रूपमा ध्वस्त भएका स्थानीयलाई अस्थायी आवास उपलब्ध गराउन साझेदारसँग मिलेर काम गर्ने मन्त्रालयको योजना छ ।

उनका अनुसार, आफन्तसँग बस्ने परिवारले आर्थिक क्षतिपूर्ति पाउनेछन् । संयुक्त राष्ट्रसंघको अनुमानानुसार २० लाखभन्दा बढी जनसंख्या रहेको गाजामा पाँच करोड टनभन्दा बढी भग्नावशेष हटाउन आवश्यक छ । यसका निम्ति करिब एक अर्ब २० करोड अमेरिकी डलरको लागत लाग्नेछ ।

त्यहाँस्थित प्यालेस्टाइनी सरकारी सञ्चारमाध्यम वाफाको कार्यालयले युद्धविरामपछिको आफ्नो पहिलो मूल्यांकनमा गाजापट्टीको ८८ प्रतिशत क्षेत्रमा क्षति पुगेको र प्रारम्भिक क्षति ३८ अर्ब डलरभन्दा बढी भएको अनुमान गरेको छ । रासस/सिन्ह्वा