काठमाडौं । नेकपा एमालेका केन्द्रीय सदस्य ऐन महरविरुद्ध परेको जबर्जस्ती करणीको मुद्दा अघि बढाउन मा उच्च अदालत पाटनले आदेश जारी गरेको छ ।

उच्च अदालतका न्यायाधीश ब्रजेशकुमार प्याकुरेल र कृष्णराम कोइरालाको इजलासले रश्मिलाकुमारी धामीको मुद्दामा सुनुवाइ गर्दै आदेश  जारी गरेको पाटन उच्च अदालतका प्रवक्ता अर्जुन आचार्यले बाह्रखरीलाई जानकारी दिए । 

ती महिलाले महरले आफूमाथि पटकपटक यौन शोषण गरेको आरोप लगाउँदै आएकी छिन् । महिला र महरबीचको भनिएको अन्तरंग कुराकानीको अडियो केही अघि सार्वजनिक भएको थियो ।

जबरजस्ती करणीको जाहेरी दिए पनि प्रहरीले दर्ता गर्न नमानेपछि यसअघि उनी सरकारी वकिल कार्यालयमा पुगेकी थिइन् । 

तर जिल्ला सरकारी वकिल कार्यालयले जाहेरी तामेलीमा राख्ने निर्णय गरेपछि धामी महरलाई पक्राउ गरी अनुसन्धान माग गर्दै उच्च अदालत पाटन पुगेकी थिइन् ।

उनको पक्षमा अधिवक्ता सुरेन्द्र भण्डारी, इन्द्र अर्याल र अञ्जना अर्यालले बहस गरेका थिए । 

यसैबीच, महरले भ्रमको खण्डन र यथार्थता भन्दै सामाजिक सञ्जालमा एक स्टाटस पोस्ट गरेका छन् । उनले लेखेका छन्–

 केहि अनलाईन मेडियामा मेरा बिरुद्ध उच्च अदालत पाटनद्धारा पक्राउ पुर्जि जारी भनेर भ्रामक समाचार सम्प्रेषण भएका रहेछन ! 
 पहिलो कुरा कानुन बमोजिम पक्राउ पुर्जि जारी गर्ने उच्च अदालतको अधिकारक्षेत्र भित्र पर्दैन र कहिल्यै पनि उच्च अदालतले पक्राउ पुर्जि जारी गर्दैन त्यो अधिकार जिल्ला अदालतको हो । दोस्रो कुरा आज उच्च अदालत पाटनमा जिल्ला सरकारि वकिलको कार्यालय काठमाडौं , जिल्ला प्रहरि परिसर काठमाडौं र  मलाई समेत बिपक्षि बनाएर दर्ता गरिएका तिन ओटा रिट मध्ये दुई ओटा खारेज भएका छन भने एउटाका सन्दर्भमा जिल्ला सरकारी वकिलको कार्यालय काठमाडौं र जिल्ला प्रहरि परिसर काठमाडौं ले मेरा बिरुद्धको जाहेरि तामेलिमा राख्ने निर्णय प्रकृयागत त्रुटी देखिन आएकोले  प्रकृया पुर्याएर निर्णय गर्नु भनेको छ । भएको यत्ति हो । यसलाई बङ्ग्याएर आफु अनुकुलको समाचार सम्प्रेषण गरेकोमा घोर आपत्ति प्रकट गर्दछु र कोहि पनि भ्रममा नपर्न सम्पुर्ण शुभचिन्तक आफन्त र सहयोगि साथिभाई हरुलाई हार्दिक अपिल गर्दछु । 
 यस बिचमा मलाई प्रत्यक्ष अप्रत्यक्ष सहयोग गर्नुहुने सम्पुर्णमा हार्दिक आभार ब्यक्त गर्दछु ।