विराटनगर । कोसी प्रदेशसभाको हिउँदे अधिवेशन सोमबार सुरु हुँदै छ । अघिल्लो अधिवेशनमा बजेट पारित गर्नेबाहेक खासै बिजनेस नपाएको सभामा योपटक सरकारले घटीमा संशोधनसहित १० वटा विधेयक लैजाँदै छ । 

यही सन्दर्भमा सत्तासीन नेकपा एमाले कोसी प्रदेश संसदीय दलका प्रमुख सचेतक विदुरकुमार लिङ्थेपले सदनमा बिजनेसको अभाव नहुने बताएका छन् । 

संसदीय पत्रकार मञ्च कोसी प्रदेशसम्बद्ध पत्रकारसँग विराटनगरमा आइतबार आयोजित अन्तरसंवादमा उनले भने,“संशोधनसहित केही फ्रेस विधेयकहरू समेत सभामा पेस हुँदै छन् । योपटक कम्तीमा दुई महिनासम्म बिजनेस अभाव हुने छैन ।” 

ठूलो दलको हिसाबले एमालेले सदनलाई चुस्त, वैज्ञानिक र वस्तुनिष्ठ ढंगले सञ्चालन गर्न सहयोगी भूमिका खेल्ने उनले बताए । 

सरकार हेरफेर भइरहँदा त्यसको असर प्रदेशसभामा समेत परेको बताउँदै उनले ठूला दल मिलेर अहिले दह्रो सरकार बनेकोले त्यो स्थिर भएर जानेमा आफू ढुक्क रहेको सुनाए । भने,“दलहरूलाई अभिमत दिने जनतालाई समेत यो कुराले विस्तारै विश्वास हुँदै गएको छ ।” 

प्रदेश सरकार गठन भएसँगै दोस्रो कार्यकालमा प्रदेशले सञ्चालन गर्ने विकास निर्माणको तथ्यांक अद्यावधिक गर्ने छुट्टै निकायका लागि आफूहरूले समेत पहल गरेको उनले बताए ।