काठमाडौं । नेपाल आहारपूरक सौन्दर्यवर्द्धक संघ (एनएनसीए)ले प्रदेश समिति विस्तार गरेको छ । काठमाडौंमा एक कार्यक्रम गरी वाग्मती प्रदेश समिति गठन गरिएको हो । विनोद पौडेलको अध्यक्षतामा १७ सदस्यीय प्रदेश समिति बनाइएको छ ।

प्रदेश समिति विस्तार कार्यक्रममा कानुनी परिधिभित्र रहेर व्यापार–व्यवसाय गर्ने अधिकार सबैलाई रहेको सरोकारवाला निकायका अधिकारीले बताए ।

अध्यागमन विभागका महानिर्देशक गोविन्दप्रसाद रिजालले व्यवसायीले व्यावसायिक सुरक्षा र चुनौतीका विषय के छन् भन्ने बारेमा छलफल चलाउन जरुरी रहेकामा जोड दिए ।

वाणिज्य, आपूर्ति तथा उपभोक्ता संरक्षण विभागका महानिर्देशक राजन पौडेलले नेपालमा कतै पनि दर्ता नभई र गुणस्तर परीक्षण नगरी सामग्री बिक्री–वितरण गरिए सरकारले कडा कारबाही गर्ने बताए ।

खाद्य प्रविधि तथा गुण नियन्त्रण विभागका वरिष्ठ खाद्य अनुसन्धान अधिकृत डा. ईश्वर सुवेदीले खाद्यवस्तुले मानव स्वास्थ्यसँग प्रत्यक्ष रूपमा सरोकार राख्ने उल्लेख गरे ।

नेपाल चिकित्सक संघका अध्यक्ष डा. अनिल कार्कीले सरकारी निकायले व्यवसाय दर्ता र अनुगमनलाई सहज बनाइदिनुपर्ने बताए ।

कार्यक्रममा एनएनसीएका केन्द्रीय अध्यक्ष विप्लव रञ्जितले कानुनसम्बद्ध व्यापार गर्ने वातावरण बनाउन सरकारको योजना प्रस्ट हुनुपर्नेमा जोड दिए ।

वाग्मती समितिको वरिष्ठ उपाध्यक्षमा बालकृष्ण पौडेल, उपाध्यक्षमा अमित सिन्हा, सन्जिव रोय, महासचिवमा कृष्ण अधिकारी, सचिवमा सुमन शंकर, कोषाध्यक्षमा मीन रिमाल र सहकोषाध्यक्षमा वसन्त थापा निर्वाचित भएका छन् । सदस्यहरूमा गीता गौतम (सामना), सृष्टि बन, सरोज चालिसे, सरोज सापकोटा, प्रशुनराज उपाध्याय, रमेश पौडेल, सन्तोश सुवेदी, अरुण महर्जन र समीर काजी श्रेष्ठ छन् ।