काठमाडौं । मधेस आन्दोलनको पहिलो सहिद रमेश महतोको सम्झनामा मधेसकेन्द्रित दलहरूले १८औँ ‘बलिदानी दिवस’ मनाएका छन् ।

०६३ साल माघ ५ गते मधेस आन्दोलनका क्रममा सिरहाको लहानमा महतो सहिद भएका थिए । प्रहरीको गोली लागेर उनको मृत्यु भएपछि मधेसभर आन्दोलन चर्किएको थियो । यसै दिनलाई मधेस प्रदेश सरकारसहित दलहरूले बलिदानी दिवसका रूपमा मनाउँदै आएका छन् ।

१८औँ ‘बलिदानी दिवस’का अवसरमा लोकतान्त्रिक समाजवादी पार्टी, नेपालको कार्यालय बबरमहलमा मधेस आन्दोलनमा सहिद भएकाहरूको तस्बिरमा माल्यार्पण गर्दै श्रद्धाञ्जली अर्पण गरियो । त्यसक्रममा लोसपा नेपालका उपाध्यक्ष श्याम गुप्ताले मधेस आन्दोलनमा आहुति दिएकाहरूको सपना अझै पूरा हुन नसकेको बताए ।

उनले मधेसी जनताको माग पूरा हुने गरी संविधान संशोधन गरिनुपर्नेमा जोड दिए । उनले मधेस देशको मेरुदण्ड भए पनि सधैँ उपेक्षित रहनुपरेकाले अब यहाँको आवाजलाई राज्यले सम्बोधन गर्ने बेला आएको धारणा राखे ।

लहानस्थित पूर्वपश्चिम राजमार्गमै पहिलो सहिद महतोसहितको सालिक निर्माण गरिएको छ । हिमालयन टेली भ्वाइस