काठमाडौं । कतारको राजधानी दोहामा हमास र इजरायलबीच युद्धविराम गर्ने विषयमा वार्ता भइरहेको छ । अन्तर्राष्ट्रिय सञ्चारमाध्यमहरूका अनुसार युद्धविरामको वार्ता यही हप्ता निष्कर्षमा पुग्ने सम्भावना छ ।

हमास र इजरायलबीच युद्धविराम भएमा हमासको कब्जामा रहेको ३३ जना बन्धक रिहा हुने अपेक्षा गरिएको छ । ७ अक्टोबर २०२३ मा हमासले इजरायलमा हमला गरेपछि २५१ जनालाई बन्धक बनाएर आफ्नो साथमा लगेको थियो ।

२५१ जना बन्धकमध्ये १५७ जना रिहा भइसकेका छन् । सन् २०२३ को २४ नोभेम्बरदेखि ३० नोभेम्बरसम्म भएको युद्धविरामका क्रममा हमासले १०९ जना बन्धक रिहा गरेको थियो । आठजना बन्धनको इजरायली सेनाले उद्धार गरेको थियो । हमासको नियन्त्रणमा रहेकामध्ये ३७ जना बन्धक मृत फेला परिसकेका छन् । त्यसैगरी इजरायली सेनाको आक्रमणमा परेर तीनजना बन्धकको मृत्यु भएको छ ।

हाल हमासको नियन्त्रणमा ९४ जना छन् । ती ९४ जनामध्ये पनि ३४ जनाको मृत्यु भइसकेको इजरायली सरकारको दाबी छ । हमासको नियन्त्रणमा रहेकामध्ये ६० जना मात्र जीवितै छन् । हमासले मृतकको शरीर पनि आफ्नो कब्जामा राखेको छ ।

यसपटक युद्धविराम भएमा रिहा हुने ३३ जनामा शव फिर्ता ल्याउने मुख्य काम हुने बताइएको छ ।

हमासको नियन्त्रणमा नेपाली विद्यार्थी विपीन जोशी पनि छन् । ७ अक्टोबर २०२३ मा उनलाई हमासले बन्धक बनाएको थियो । इजरायली सरकारका अनुसार उनी हमासको नियन्त्रणमा जीवितै छन् । यसपटक हुनसक्ने सम्भावित युद्धविरामका क्रममा विपीन रिहा हुने/नहुने अझै निश्चित छैन ।