ढाका । बंगलादेशको भ्रष्टाचारविरोधी आयोगले त्यहाँकी सत्ताच्युत प्रधानमन्त्री शेख हसिना र उनको परिवारविरुद्ध भ्रष्टाचार मुद्दा दायर गरेको छ । यो सूचीमा बेलायती सरकारका मन्त्री र संयुक्त राष्ट्रसंघका एक वरिष्ठ अधिकारी पनि समावेश छन् । 

सन् २०२४ अगस्टको क्रान्तिपछि ७७ वर्षीया हसिना छिमेकी भारत भागेकी थिइन् । उनीमाथि सामूहिक हत्यासहितका आरोप लागे पनि उनले बंगलालादेश सरकारले गरेको प्रत्यर्पण अनुरोध अस्वीकार गरेकी थिइन् । 

यी मुद्दा राजधानी ढाकाको उपनगरमा रहेका मूल्यवान् जग्गाहरूको कथित अतिक्रमणसँग सम्बन्धित छन् । “शेख हसिनाले केही अधिकारीहरूसँग मिलेर आफू र आफ्ना परिवारका सदस्यहरूका लागि प्लटहरू छुट्याउनुभयो,” भ्रष्टाचारविरोधी आयोग (एसीसी)का महानिर्देशक अख्तर हुसेनले पत्रकारलाई भने । 

यस मामिलामा नाम उल्लेख गरिएका व्यक्तिहरूमा हसिनाकी भतिजी एवं बेलायती भ्रष्टाचारविरोधी मन्त्री ट्युलिप सिद्दिक पनि रहेको हुसेनले जानकारी दिए । यद्यपि, सिद्दिकले आफूले केही गलत नगरेको दाबी गरेकी छिन् । 

विश्व स्वास्थ्य संगठनकी दक्षिणपूर्वी एसियाकी प्रमुख सायमा बाजेद पनि यो सूचीमा छिन् । उनी हसिनाकी छोरी हुन् । बाजेदबाट तत्काल कुनै प्रतिक्रिया आएको छैन ।

“एसिसी अनुसन्धान टोलीले आवश्यक कागजातहरू प्राप्त गरेको छ र मुद्दा दायर गर्न पर्याप्त प्रमाण फेला पारेको छ,” हुसेनले भने, “थप अनुसन्धान गर्दा सम्पत्ति प्राप्तिका सम्बन्धित विवरणहरू पनि समावेश गरिनेछन् ।”

हसिनाका छोरा सजीब वाजेद जोय र सिद्दिककी आमा एवं हसिनाकी बहिनी शेख रेहानाको नाम पनि राखिएको छ । 

बंगलादेशको भ्रष्टाचारविरोधी आयोगले डिसेम्बरमा रुसी लगानीको आणविक ऊर्जा संयन्त्रसँग सम्बन्धित पाँच अर्ब डलरको कथित हिनामिना गरेको आरोपमा हसिनाको परिवारविरुद्ध अनुसन्धान सुरु गरेको थियो ।

घुसको आरोप १२ अर्ब ६५ करोड डलरको रुपपुर आणविक संयन्त्रसँग सम्बन्धित छ । उक्त संयन्त्रमा मस्कोले ९० प्रतिशत ऋण लगानी गरेको थियो । रासस/एएफपी