काठमाडौं । आगामी चैतको दोस्रो सातामा राष्ट्रिय स्पोर्ट्स क्लाइम्बिङ च्याम्पियनसिप हुने भएको छ ।

नेपाल क्लाइम्बिङ खेल संघको आयोजनामा चैत ८ र ९ गते काठमाठौंमा राष्ट्रिय स्पोर्ट्स क्लाइम्बिङ च्याम्पियनसिप हुन लागेको हो । संघले आइतबार काठमाडौंमा पत्रकार सम्मेलन आयोजना गर्दै प्रतियोगिताबारे जानकारी दिएको छ ।

कृतिम तथा प्राकृतिक उचाइ भएको स्थान (बाल र चट्टानले बनेका अग्लो स्थान)मा खेलिने साहसिक प्रतिस्पर्धा नै स्पोर्ट्स क्लाइम्बिङ खेल हो । दुई दिनसम्म हुने प्रतियोगितामा लिड र बोल्डर विधामा खेलाइने भएको छ । राष्ट्रियस्तरको खुला प्रतियोगितामा १४ वर्षदेखि माथि उमेरका खेलाडीले मात्र प्रतिस्पर्धा गर्न पाउनेछन् ।

स्पोर्ट्स क्लाइम्बिङ र साहसिक खेलकुदसँगै खेल पर्यटन विकास र प्रवर्द्धन गर्ने उद्देश्यले यस प्रतियोगिता गर्न लागेको संघले जनाएको छ ।

अन्तर्राष्ट्रिय क्लाइम्बिङ खेलकुद महासंघ (आईएफएससी)को मापदण्डअनुरूप खेल हुने भएको छ । खेलको जोखिम तथा दुर्घटनालाई मध्यनजर गरी सहभागी खेलाडी तथा खेल प्राविधिकको बिमा गरिएको छ ।

खेलका प्रतिस्पर्धा बिहान ८ बजेदेखि सुरु हुनेछ । पुरुष तथा महिलातर्फ छनोटचरण खेल हुनेछ । छनोटबाट महिला र पुरुषमा समान आठजनाले फाइनल राउन्डको यात्रा तय गर्ने भएका छन् । फाइनलमा प्राप्त अंकको आधारको वरीयता निर्धारण गरिने संघले जनाएको छ ।

विजेताले नगद पुरस्कारसहित पदक र प्रमाणपत्र प्रदान गर्ने संघका अध्यक्ष रमेश पौडेलले जानकारी दिए । संघका अध्यक्ष पौडेलले नगद पुरस्कारबारे हालसम्म टुंगो नलागेको र केही दिन पुरस्कार रकमबारे जानकारी दिने उल्लेख गरेका छन् ।