काठमाडौं । नेपाली कांग्रेसका पूर्वमहामन्त्री डा. शशांक कोइरालाले कार्यकारी सभापतिका पक्षमा मत जाहेर गरेका छन् । नेपाली कांग्रेसको भातृ संस्था प्रजातन्त्र सेनानी संघको लुम्बिनी प्रदेश महाधिवेशन उद्घाटनका लागि आइतबार दाङ पुगेका डा. शशांकले कांग्रेसलाई पूरानै अवस्थामा पुर्‍याएर देशको भविष्य बदल्नुपर्ने बताए ।

“कांग्रेसमा सभापतिको चुनाव हुन्छ । निर्वाचित भएपछि त उसैले निर्णय गर्नुपर्छ उसैले चलाउनुपर्छ,” डा. शशांकले भने “अहिले त हामी यति धेरै लोकतान्त्रिक भइसकेका छौँ कि सबैको चुनाव गर्छाैँ । अनि पंगु सभापति भएर के गर्ने ? आफू सभापति अरु सब अर्कै विचारका मान्छेहरू हुन्छन् ।”

उनले त्यही कारण सभापति कार्यकारी हुने अभ्यास फर्काउनुपर्ने बताए । “चुनाव सभापतिका लागि हुन्छ, त्यसबेलासम्म तेरो–मेरो भन्न पाइन्छ । तर, सभापति बनाइसकेपछि त सबै अधिकार उसैको हुनुपर्‍यो । त्यसलाई सबैले स्वीकार्ने काम गर्नुपर्छ,” उनले भने ।

उनले कांग्रेसभित्रको तिक्तताको असर देशलाई नै पर्ने गरेको बताए । हिजोदेखि वैचारिक प्रस्टताकै कारण गौरवपूर्ण इतिहास बनाएको पार्टी अहिले आन्तरिक किचलोमा अल्झिने अवस्था पनि पार्टीले नेतृत्व चयनका लागि गरेको अभ्यासका कारण आएको उनले बताए । “यो पार्टी वैचारिक प्रस्टताले आजको दिनसम्म आएको छ । बीपी कोइरालाको समयमा कुनै समावेशी संविधान नभए पनि मन्त्रिपरिषद्मा महिला, थारुसहित अटाएका थिए,” डा. शशांकले भने, “एसियाकै पहिलो महिलामन्त्री नेपालमा उहाँले नै बनाउनुभएको हो । द्वारिकादेवी ठकुरानी एसियाकै पहिलो महिलामन्त्री हुनुभयो ।”

उनले बीपीको प्रस्टताले कांग्रेसको राजनीति यहाँसम्म आएको भन्दै अब त्यसको विरासत अघि बढाउने प्रस्टता आवश्यक भएको बताए । “बीपीमा यति प्रस्टता थियो कि –विचारले उहाँमा कुनै कन्फ्युजन थिएन । अहिले मिसन ०८४ भन्छन्, म त त्यस्तो मिसनमा विश्वास गर्दिनँ, त्यसलाई मिसन पनि मान्दिनँ,” डा शशांकले भने, “म त ७०÷८० वर्षको इतिहास बोकेको पार्टी यस्तो अन्योल र अस्पष्टतामा हुन्छ भन्ने ठान्दिनँ ।”

उनले आफू सभापतिको उमेदवार बन्नुपर्छ भन्ने ठानेपछि हुने निर्णयमा नपुगिसकेको भन्दै सभापतिको उमेदवार बन्छु भनेका डा. शेखर र गगनलाई पार्टी सभापति बन्ने योजनाबारे प्रश्न गर्न कार्यकर्तालाई आग्रह गरे । “पार्टीमा शेखर कोइराला, गगन थापाहरू छन् । उहाँहरूलाई प्रि–प्लान के छ सोध्दिनुस् । म पनि लड्नुपर्छकी भन्ने योजनामा छु । तर अहिले भन्दिन, घोषणापछि आफ्नो प्लान बताउनेछु ।”

कोइरालाले अहिले नै योजना भन्दिन भनेपछि मञ्चमा हाँसोको फोहोरा छुटेको थियो । “म चाहन्छु नेपाली कांग्रेस त्यही पुरानो विचारबाट बीपीको सिद्धान्तबाट अघि बढोस् । समावेशी विधान नहुँदै सबैलाई समेटिएको थियो,” डा. शशांकले भने, “अहिले आरक्षण दिएर अपमानित भएको छ मेरो दृष्टिकोणमा त । के हामी कसैको अपमान गर्न चाहन्छौँ, चाहँदैनौँ नि ! सबैलाई सम्मान गर्न चाहन्छौँ ।”

उनले अहिले इतिहासलाई नकारात्मक चस्माबाट हेर्न अभ्यास भइरहेको भन्दै त्यो गलत भएको बताए । उनले इतिहासलाई गाली गर्नुको साटो भविष्यको योजनामा लाग्नु उपयुक्त हुने उनको सुझाव थियो ।

“हामीले इतिहासलाई नकारात्मक दृष्टिले हेर्छौँ । इतिहासले गरेर अहिले हामी यहाँ छौँ । बीपी कोइराला नभएको भए हामी कहाँ हुन्थ्यौँ । झन् म त कहाँ हुन्थे ?,” शशांकले भने, “इतिहासबाट जन्मिएको वर्तमान हो । यो वर्तमानलाई उज्ज्वल भविष्यमा लैजाने हो । म त सोच्दैछु अबको २० वर्षपछि के हुन्छ ? त्यतिबेला मेरो मृत्यु भइसकेको हुन्छ, त्यसबेलासम्म मुलुकलाई सुरक्षित र समृद्ध बनाउने कांग्रेस रहनुपर्छ ।”