काठमाडौं । प्रमुख तीन दलनिकट कर्मचारी संगठनका नेताहरूले निजामती विधेयकलाई सकसमा पारेका छन् । उनीहरूले दलीय ट्रेड युनियन खारेज गरे हडतालमा उत्रिनेसम्मको धम्की दिएका छन् ।

शुक्रबार संसद्को राज्य व्यवस्था तथा सुशासन समितिले दलनिकट ट्रेड युनियनका नेताहरूलाई निजामती विधेयकबारे छलफलका लागि बोलाएको थियो । छलफलमा उनीहरूले ट्रेड युनियनबारे पुरानै व्यवस्थालाई निरन्तरता दिनुपर्ने बताए ।

बैठकमा एमाले निकट नेपाल निजामती कर्मचारी संगठनका अध्यक्ष लेखनाथ काेइरालाले ट्रेड युनियनको अधिकार खुम्च्याउन नहुने बताए । उनले ट्रेड युनियनलाई हटाउन नहुने बरु व्यवस्थित गर्नुपर्नेमा जोड दिए । उनले निजामती विधेयकमा छलफल गर्दा प्रदेश र स्थानीय तहका कर्मचारी खुसी नभएको पनि जिकिर गरे ।

"जति ट्रेड युनियन छाैँ, साझा सुझाव छ । नाै वर्षकाे समयावधिमा जे टुंगिएका छन्, फेरि खाेतल्ने कुराले काम कारबाही ढिला गर्छ कि । संघीय निजामती विधेयकमा छलफल गर्दा प्रदेश र स्थानीय तहका कर्मचारी खुसी छैनन् । कानुनले विभेद गर्न हुन्न," उनले भने ।

उनले सरुवा र बढुवा प्रणालीलाई व्यवस्थित गर्नुपर्ने बताए । उनले कर्मचारीकाे प्रमाेसन छिटाे हुने व्यवस्था गर्नुपर्ने पनि बताए ।

"चक्रिय स्वचालित गराैँ । कसैलाई हारगुहार गर्न नपर्ने गरी लेखाैँ । पाँच वर्ष एउटै पदमा काम गर्नेलाई एक र १० वर्ष काम गरेकालाई दुई तह वृद्धि गराैँ । उमेरहद ६० बनाऔँ, विभेद गर्न हुन्न । सेवा प्रवेश महिलाका लागि ४० र पुरुष ३५ ठिक छ," कोइरालाले भने ।

यस्तै, नेपाली कांग्रेस निकट नेपाल निजामती कर्मचारी युनियनका अध्यक्ष गाेपालप्रसाद पाेखरेलले ट्रेड युनियनबारे 'बेमाैसम बाजा' बजाएकाे बताएका छन् । पोखरेलले अहिले ट्रेड युनियनलाई लिएर एकल बहस गरिएको बताए ।

"देशमा जुन परिवर्तन भयाे, फ्रन्टलाइनमा राष्ट्रसेवक गएकाे छ । एकल बहस भयो, दु:ख लागेकाे छ । लाेकतन्त्रकाे कुरा गर्नुहुन्छ । एकलकाे कुरा किन ?," उनले भने ।

उनले ट्रेड युनियनको अधिकारलाई एक इन्च पनि तलमाथि गर्न नसक्ने बताए । "व्यवस्थित गराैँ, कसैले गलत गरेकाे छ भने कारबाही गराैँ । २१औँ शताब्दीमा विचार राख्न पाइन्छ," उनले भने ।

उनले सरुवा व्यवस्थालाई वैज्ञानिक बनाउनुपर्नेमा जोड दिए । "सरुवामा अराजकता भएकाे छ भने निकास निकाल्ने हाे," उनले भने ।

पोखरेलले विधेयकमा ट्रेड युनियन खारेजको व्यवस्था गरिए बन्द हडतालमा उत्रिने चेतावनी दिए । उनले कांग्रेसका तत्कालीन सभापति गिरिजाप्रसाद कोइरालाले बन्द हडतालसम्मको अधिकार दिएको स्मरण गरे । 

यसैगरी, नेकपा (मा‌ओवादी केन्द्र) निकट नेपाल राष्ट्रिय निजामती कर्मचारी संगठनका अध्यक्ष अम्बादत्त भट्टले ट्रेड युनियन हटाउन नहुने बताएका छन् । अध्यक्ष भट्टले ट्रेड युनियनको हकमा पुरानै व्यवस्थालाई निरन्तरता दिनुपर्ने बताए ।

"सुशासन बिगार्ने ट्रेड युनियन हाे, हटाउनुपर्छ भन्ने भाष्य निर्माण भइरहेकाे छ । हामी नेपाली हाैँ । हाम्राे अधिकार अतिक्रमण गर्न मिल्छ कि मिल्दैन ? ट्रेड युनियनका हकमा जे व्यवस्था छ, त्यही राख्नुपर्छ । कसरी व्यवस्थित गर्ने ऐन आएपछि छलफल गराैँला," उनले भने ।

उनले आस्थाका आधारमा सरुवा गर्ने गरिएको पनि बताए । "आस्थाका आधारले सरुवा गरिएकाे छ । दाेषजति हामीलाई, अरूलाई काम अन्तबाट भएकाे छ । सरुवालाई ट्रेड युनियनले हेर्न नपाउने बनाऔँ," उनले भने ।