काठमाडौं । अमेरिकन चेम्बर अफ कमर्स इन नेपाल (एमच्याम)को तेस्रो साधारणसभा सम्पन्न भएको छ । नेपालमा अमेरिकी लगानी भित्र्याउने र दुई देशबीच व्यावसायिक सम्बन्ध स्थापना गर्ने उद्देश्यले स्थापना भएको एमच्यामको साधारणसभामा पछिल्लो एक वर्षको समीक्षासहित भावी कार्ययोजनासमेत प्रस्तुत गरिएको थियो ।

कार्यक्रममा यूएस च्याम्बर अफ कमर्स, दक्षिण एसियाका कार्यकारी निर्देशक सिद्धान्त मेहराले नेपालमा स्थापनाको छोटो समयमा एमच्यामले खेलेको भूमिकाको प्रशंसा गरे ।

एमच्यामका अध्यक्ष निर्मलकाजी श्रेष्ठले सन् २०२४ एमच्यामका लागि महत्त्वपूर्ण वर्ष भएको उल्लेख गरे । नेपालमा लगानीका नयाँ अवसर सिर्जना गर्न, नेपाल र अमेरिकाको व्यापारिक सम्बन्ध थप बलियो बनाउने उद्देश्यका साथ क्रियाशील रहेको उनको भनाइ छ ।

एमच्यामले नेपालमा विदेशी लगानीका लागि देखिएका समस्या समाधानका विभिन्न विषयमा पैरवी गर्नुका साथै उच्चस्तरीय भेटघाटसमेत गर्दै आएको श्रेष्ठले उल्लेख गरे ।

अध्यक्ष श्रेष्ठले सन् २०२१ मा अजित विक्रम शाहको नेतृत्व र नेपालस्थित अमेरिकी दूतावासको अभूतपूर्व सहयोगमा स्थापना भएको एमच्याम आज बहुआयामिक र प्रभावशाली व्यावसायिक समूहका रूपमा स्थापित भएकामा खुसी व्यक्त गरे ।

त्यसअवसरमा पछिल्लो एक वर्षमा एमच्यामले विभिन्न ५८ पटक औपचारिकरूपमा सदस्यको हितमा पैरवी गरेको जनाएको छ । यसबीचमा २० वटा उच्चस्तरीय भेटघाट, विभिन्न विषयमा ६० वटा आलेखमार्फत पैरवीलाई अघि बढाएको जनाएको छ । यसबीचमा एमच्यामले कोषमा ३१.५ लाख रुपैयाँ जम्मा भएको उल्लेख गरेको छ ।

एमच्यामले पछिल्लो एक वर्षमा १६ वटा नयाँ सदस्य थप गरेको छ । सन् २०२३ मा ३८ वटा सदस्य रहेकामा अहिले उक्त संख्या बढेर ५४ पुगेको हो । नेपालमा लगानीमैत्री वातावरण बनाउनका लागि सरोकारवाला पक्षसँग विभिन्न समयमा छलफल, अन्तरक्रिया तथा बहस गर्दै आएको एमच्यामका महाप्रबन्धक अमिरराज थापाले जानकारी दिए ।

एमच्यामले वर्षभरि नै विभिन्न औपचारिक र अनौपचारिक कार्यक्रममार्फत सक्रियता जारी राखेको जनाएको छ । गत अप्रिलमा संस्थाले यूएस चेम्बर अफ कमर्सका एम्ब्यासडर अतुल केशवसँग नेपाल–अमेरिकाबीचको व्यापारिकसम्बन्धमा अन्तरक्रिया गरेको थियो भने सदस्यहरूसँग युनाइटेड स्टेट पेटेन्ट एन्ड ट्रेडमार्क कार्यालय र युनाइटेड स्टेट ट्रेड एन्ड डेभलपमेन्ट एजेन्सीसँग पनि अन्तरक्रिया भएको एमच्यामले उल्लेख गरेको छ ।