काठमाडौं । दोलखामा आगलागी हुँदा एकजना घाइते भएका छन् । जिरी नगरपालिका–२, छेर्मादिङस्थित ढुंगा र माटोबाट निर्मित जस्ताको छानो रहेको दुईतले कच्ची घरमा आगलागी भएको हो ।

स्थानीय ३४ वर्षीय भीमबहादुर खड्काको उक्त घरमा बुधबार (हिजो) बेलुका करिब ८ बजेतिर आगलागी भएको थियो । भान्साकोठामा ट्रयाक्टरमा प्रयोग गर्न राखिएको ‘पेट्रोल’को भाँडामा आगो सल्कँदा घर जलेर नष्ट भएको वाग्मती प्रदेश प्रहरी कार्यालयले जनाएको छ ।

“किचनको नजिकै ट्रयाक्टरमा प्रयोग गर्ने पेट्रोलको भाँडा राखिएको रहेछ, त्यसमा आगो सल्किएर आगलागी भएको उहाँहरू (परिवार)ले भन्नुभएको छ,” प्रहरी निरीक्षक घनेन्द्र हाङ खजुमले बाह्रखरीसित भने ।

आगो निभाउने क्रममा घरधनी खड्का घाइते भएका भएका थिए । उनको बायाँ खुट्टाको घुँडामुनिको भागमा आगोले पोलेको प्रहरीले जनाएको छ ।

स्थानीय र प्रहरीको सहयोगमा बुधबारै राति करिब ९ः५० बजे आगलागी नियन्त्रणमा लिइएको थियो । घाइते खड्का जिरी अस्पतालमा उपचारपश्चात् बिहीबार बिहान ‘डिस्चार्ज’ भएका प्रहरी निरीक्षक हाङ खजुमले बताए ।

आगलागीबाट करिब ३३ लाख रुपैयाँबराबरको धनमाल जलेर नष्ट भएको भन्दै खड्काले प्रहरी कार्यालयमा निवेदन दिएका छन् ।