काठमाडौं । पूर्वाधार विकास समितिमा विभिन्न मन्त्रालयसँग जोडिएका आयोजनाहरूको विषयमा २२ वटा उजुरी परेको छ । बुधबार प्रतिनिधिसभाअन्तर्गतको पूर्वाधार विकास समिति बैठकमा २२ उजुरी परेको समितिले जानकारी दिएको हो ।

समितिमा भौतिक पूर्वाधार तथा यातायात मन्त्रालयअन्तर्गत आठ, ऊर्जा जलस्रोत तथा सिँचाइ मन्त्रालय तीन, खानेपानी मन्त्रालय दुई, सहरी विकास मन्त्रालय चार, रक्षा मन्त्रालय एक र अन्य चार गरी २२ उजुरी परेको समिति सभापति दीपकबहादुर सिंहले बताए । उनले समितिमा कतिपय उजुरीहरू दोहोरो वा तेहेरो रूपमा परेको जानकारी दिए । समितिमा परेका २२ उजुरीको विषयमा सांसदहरूको छलफलबाट समाधानको लागि पहल गर्ने निर्णय भएको उनले बताए ।

हाइड्रोपावर निर्माण, प्रसारणलाइनका विषयमा परेका उजुरीको विषयमा अध्ययन गर्न पूर्वऊर्जामन्त्री शक्तिबहादुर बस्नेतको संयोजकत्वमा पाँच सदस्य उपसमिति गठन गरिएको छ । भौतिक पूर्वाधार तथा यातायात मन्त्रालयअन्तर्गतका उजुरी तथा सडक मापदण्डका विषयमा अध्ययनको लागि पूर्वभौतिक पूर्वाधार तथा यातायातमन्त्री प्रकाश ज्वालाको संयोजकत्वमा अर्को उपसमिति बनाएको उनले बताए ।

उनले भने, "पूर्वाधार विकास समितिमा २२ वटा उजुरी परेका थिए । कतिपय उजुरीहरू दोहोरिएर पनि आएका थिए । सबै उजुरीका विषयमा समितिमा छलफल गरी विभिन्न खालका निर्णय गरेका छौँ ।"

उनले भौतिक पूर्वाधार तथा यातायात मन्त्रालयले मन्त्रीपिच्छे हचुवाको भरमा सडक मापदण्ड तोक्नु राम्रो नभएको भन्दै कुन मापदण्ड र नियमअनुसार तोकिएको भन्ने विषय समितिलाई जानकारी दिन निर्देशन दिए ।