काठमाडौं । परोपकारी संस्था हेल्प नेपाल नेटवर्कको २५औँ वार्षिकोत्सव, रजत महोत्सव तथा ग्लोबल मिट सम्पन्न भएको छ ।

शनिबार राष्ट्रिय सभागृहमा आयोजित कार्यक्रममा हेल्प नेपालले परोपकारिताका क्षेत्रमा समर्पित व्यक्ति तथा संस्थालाई अभिनन्दन गर्‍यो । विश्वप्रसिद्ध नेत्र शल्यचिकित्सक डा. सन्दुक रुइतले वरिष्ठ हृदयरोग विशेषज्ञ तथा बाल मुटु अस्पतालको निर्माण अभियानमा समर्पित डा. भगवान कोइरालालाई अभिनन्दन गरे ।

यस्तै, डा. रुइतले मानव सेवा आश्रम हेटौँडाका समाजसेवीहरू रामजी अधिकारी र सुशीला (रुपा) केसी र अटिजम भएका बालबालिकाको सेवामा समर्पित विशेष स्कुल तथा पुनर्स्थापना केन्द्र (एसएसडीआरसी)की संस्थापक तथा समाजसेवी सविता उप्रेतीलाई अभिनन्दन गरे ।

उक्त अवसरमा हेल्प नेपालले मुगुका विर्खबहादुर रोकाया तथा अरू सहयोगीहरू कर्णबहादुर बुढा, डा. अरुणा उप्रेती, भरत कोइराला, सूर्यनारायण यादव, किरण भण्डारी, नन्दकृष्ण जोशी र देवेन्द्र बस्नेतलाई कदरपत्र प्रदान गर्‍यो ।

सोही अवसरमा नेटवर्कले संस्थालाई प्रारम्भिक समयमा नगद राशि प्रदान गर्दै सहयोग गर्ने सिद्धार्थ राणा, डा. उपेन्द्र महतो, जीवा लामिछानेसहित २५ जनामध्ये उपस्थित व्यक्तित्वलाई सम्मान गर्‍यो । 

कार्यक्रममा डा. रुइतले हेल्प नेपाल नेटवर्कले गरेको कामको प्रशंसा गरे । संस्थाले डायस्पोरालाई फूलको मालाझैँ बनाएर राखेको भन्दै उनले खुसी व्यक्त गरे । डा. रुइतले भने, “आज नेपालीहरू संसारको कुनाकुनामा छन् । उहाँहरू नेपालका लागि बौद्धिक सम्पत्ति हुनुहुन्छ । त्यसैले उहाँहरूले आएर आफूले सिकेको कुरा हामीलाई सिकाउनुपर्छ ।” 

नेटवर्कका अध्यक्ष अरुणसिंह बस्नेतले २५ वर्षसम्म प्राप्त सहयोग र सद्भावको चर्चा गरे । आउँदा दिनमा पनि यही गतिमा काम गर्दै जाने उनले प्रतिबद्धता व्यक्त गरे ।

डा. भगवान कोइराला, सविता उप्रेती र रामजी अधिकारीले यो अभिनन्दनले आफूहरूलाई काम गर्न थप प्रेरणा र ऊर्जा मिलेको बताए ।

हेल्प नेपाल नेटवर्कले मुगुको मुर्मामा हेल्थपोस्ट, धुलिखेलमा बाल आश्रम सञ्चालन गर्दै आएको छ । शिक्षा, स्वास्थ्य र विपद्को परिस्थितिमा सेवा र सहयोग गर्दै आएको छ ।