कास्की । सञ्चार तथा सूचना प्रविधिमन्त्री पृथ्वीसुब्बा गुरुङले प्रमुख राजनीतिक दलहरूसँगको सहमतिमा संविधान संशोधन गरिने बताएका छन् । कास्कीको माछापुछ्रे गाउँपालिका–१, टुसेमा निर्मित नानामोहन ज्येष्ठ नागरिक सेवा केन्द्र भवनको शनिबार उद्घाटन गर्दै उनले यस्तो बताएका हुन् । संशोधनका निम्ति संविधानको समीक्षा गरिने उनको भनाइ छ ।

सरकारका प्रवक्ता समेत रहेका सञ्चारमन्त्री गुरुङले भने, “सरकारमा रहेका प्रमुख दुई दलको उच्चस्तरीय राजनीतिक संयन्त्र बनेको छ । यस संयन्त्रको पहिलो काम संविधान संशोधनका लागि प्रक्रियागत काम प्रारम्भ गर्नु हुनेछ । प्रतिनिधिसभा र राष्ट्रियसभाका समितिमा विचाराधीन विधेयकहरू शीघ्र अनुमोदन गर्ने र रोकिएका विधेयक मापदण्ड तयार गरी यथाशीघ्र टुंगो लगाउने सरकारको योजना छ ।”

प्रदेश र स्थानीय तहका निम्ति आवश्यक कानुन चाँडै निर्माण गर्न प्रक्रियागत काम सरकारले अघि बढाएको उनले जानकारी दिए । उनले ज्येष्ठ नागरिकका निम्ति सेवा केन्द्र स्थापना हुनु सकारात्मक भएको बताए । केन्द्र सञ्चालनका निम्ति सरकारका तर्फबाट सहयोग हुने  उनले प्रतिबद्धता व्यक्त गरे । उनले भने, “ज्येष्ठ नागरिकको हकहित र अधिकार संरक्षण गर्न  सरकार प्रतिबद्ध छ ।”

त्यस अवसरमा स्वीट्जरल्यान्डका एहमान स्टिफटङको पाँच करोड रुपैयाँ आर्थिक सहयोगमा निर्मित दिवा सेवा केन्द्र भवन आमास्मृति प्रतिष्ठानलाई हस्तान्तरण गरिएको थियो । भवन निर्माणका निम्ति स्थानीय कर्णबहादुर गुरुङले आफ्ना स्व. आमा नाना र बुवा मोहनको स्मृतिमा चार रोपनी जग्गा प्रदान गरेका थिए । रासस