काठमाडौं । अमेरिकाका विश्वविद्यालयहरूले विदेशी विद्यार्थीलाई नवनिर्वाचित राष्ट्रपति डोनाल्ड ट्रम्पले शपथ लिनुअगाडि नै कलेजमा हाजिर हुन भनेका छन् ।

यतिखेर अमेरिकाका धेरैजसो विश्वविद्यालयमा जाडो बिदा छ । जाडो बिदामा घर गएका विदेशी विद्यार्थीलाई अमेरिकी विश्वविद्यालयले २० जनवरीअगाडि नै अमेरिका आउन भनेका छन् । अमेरिकामा १.१ मिलियनभन्दा बढी विदेशी विद्यार्थीले सन् २०२३–२४ शैक्षिक वर्षमा भर्ना लिएका छन् ।

नवनिर्वाचित अमेरिकी राष्ट्रपति डोनाल्ड ट्रम्पले २० जनवरीमा राष्ट्रपतिको शपथ लिनेछन् । ट्रम्पले अमेरिकी अध्यागमन नियम कडा बनाउने आशंका गरिएको छ ।  ट्रम्पले मुस्लिम देश र अमेरिका विरोधी देशका मान्छेलाई अमेरिका छिर्न नदिने नीति लिने अनुमान गरिएको छ ।

न्युयोर्क विश्वविद्यालयबाट राजनीतिशास्त्रमा स्नातक उत्तीर्ण गरेका भारतका २३ वर्षीय विद्यार्थी प्रमथप्रताप मिश्राले भन्छन्, “यो अन्तर्राष्ट्रिय विद्यार्थीहरूको लागि डरलाग्दो समय हो ।”

ट्रम्पले शपथ लिएपछि विदेशी विद्यार्थीको यात्रामा प्रतिबन्ध लगाउने सम्भावना छ भन्दै अमेरिकाको कर्नेल विश्वविद्यालयले आफ्ना विद्यार्थीलाई बताएको छ । यति मात्र होइन, यस्तो प्रतिबन्धले पढाइ समेत ढिला हुनसक्ने उनले बताए ।

दक्षिणी क्यालिफोर्निया विश्वविद्यालयले पनि विदेशी विद्यार्थीहरूलाई इमेल पठाउँदै ट्रम्पको शपथ ग्रहणभन्दा एक हप्ताअगावै अमेरिका फिर्त हुन भनेको छ ।

ट्रम्पले आफ्नो पहिलो कार्यकालमा कीर्गिजस्तान, नाइजेरिया, म्यानमार, सुडान, तान्जानिया, इरान, लिबिया, उत्तर कोरिया, सिरिया, भेनेजुएला, यमन र सोमालियामाथि प्रतिबन्ध लगाएका थिए । तर, यसपटक ट्रम्पले यो सूचीमा चीन र भारत पनि समेटने सम्भावना रहेको विश्वविद्यालयले बताएको छ । चुनावी अभियानका क्रममा ट्रम्पले इरान, लिबिया, इराक, सुडान, सोमालिया, सिरिया र यमनका मानिसको अमेरिका आवागमन कडाइ गर्ने र अघिल्लो कार्यकालमा आफूले लगाएको यात्रा प्रतिबन्धलाई फेरि सुरु गर्ने बताएका थिए । ट्रम्पले प्रतिबन्धित गरेको देशहरूलाई जो बाइडेनले सन् २०२१ मा पदभार ग्रहण गरेपछि प्रतिबन्ध फुकुवा गरेका थिए ।

सन् २०२३ को अक्टोबरमा इजरायल–हमास युद्ध भयो । त्यो युद्धको विरोधमा अमेरिकामा विदेशी विद्यार्थीले विरोध प्रदर्शन गरे । त्यतिखेर ट्रम्पले अमेरिकाविरोधी प्रदर्शन गर्ने विदेशी विद्यार्थीलाई निकाला गर्ने चेतावनी दिएका थिए ।