काठमाडौं । नेपाली कांग्रेस र नेकपा (एमाले)को संयुक्त कार्यदलले संघीय संसद्को संसदीय समितिमा विचाराधीन विधेयकलाई अघि बढाउन अन्य दलसँग छलफल गर्ने निर्णय गरेको छ ।

कांग्रेस संसदीय दलको कार्यालय सिंहदरबारमा बिहीबार बसेको संघीय संसद्‌मा विचाराधीन विधेयकका सन्दर्भमा गठित दुई दलीय कार्यदलको पहिलो बैठकले प्रतिनिधिसभा र राष्ट्रियसभाका समितिमा विचाराधीन रहेका विधेयकलाई संसद्को आगामी अधिवेशनबाट पारित गराउन अन्य दलसँग छलफल गर्ने निर्णय गरेको हो ।

अन्य दलका प्रमुख सचेतक र सचेतकसँग छलफल गर्ने जिम्मेवारी कांग्रेसका मुख्य सचेतक श्यामकुमार घिमिरे र एमालेका प्रमुख सचेतक महेश बर्तौलालाई दिइएको कांग्रेस सांसद जीवन परियारले जानकारी दिए । बैठकले संसदीय समितिमा रहेका विधेयकहरुलाई अघि बढाउने विषयमा आ–आफ्ना दलका सांसदहरूसँग पुस १७ गतेभित्र छलफल गर्ने निर्णय गरेको उनले बताए ।

त्यस्तै, बैठकले संसदीय समितिमा रहेका विधेयकहरूलाई समयसीमाभित्रै पारित गरी संघीय संसद्‌मा पेस गर्ने सन्दर्भमा प्रतिनिधिसभा र राष्ट्रियसभाका साथै संयुक्त संसद्को नियमावलीका विषयमा अन्य दलसँग परामर्श गर्ने निर्णय गरिएको परियारले जानकारी दिए ।

समितिमा लामो समयसम्म विधेयक रहने कुरा उचित नभएकाले समयसीमाभित्रै अघि बढाउन नियवमालीमा रहेको व्यवस्थाका बारेमा अन्य दलसँग छलफल गरिने उनले बताए । कार्यदलको अर्को बैठक पुस १८ गते बस्ने बताइएको छ । पस ९ गते प्रधानमन्त्री निवास बालुवाटारमा बसेको  दुई दलीय संयन्त्रले संयुक्त कार्यदल गठन गर्ने निर्णय गरेको थियो ।