काठमाडौं । ललितपुरमा एक इन्जिनियरिङ अध्ययनरत विद्यार्थीको हत्या गरिएको छ । च्यासलस्थित टाउन हब रेस्टुरेन्टमा सोमबार (हिजो) राति सुनसरीको इटहरीका २३ वर्षीय नयन गुरुङको हत्या गरिएको हो । उनी ललितपुरकै सातदोबाटोमा बस्दै आएका थिए ।

उनी च्यासलकै हिमालय इन्जिनियरिङ कलेजको बीई चौथो सेमेस्टरको विद्यार्थी भएको खुलेको छ । ग्राहकका रूपमा उनी रेस्टुरेन्ट पुगेका थिए । चक्कु प्रहार गरी उनको हत्या गरेको देखिएको प्रहरीले जनाएको छ ।

गुरुङको हत्या आरोपमा जिल्ला प्रहरी परिसर ललितपुरको टोलीले तीनजनालाई पक्राउ गरेको छ । पक्राउ पर्नेमा रेस्टुरेन्टका कर्मचारीत्रय डडेलधुराका हेमराज भट्ट, काभ्रेका जनकबहादुर लामा र दार्चुलाका पदमराज भट्ट छन् ।

सोमबार राति नै उनीहरूलाई पक्राउ गरिएका ललितपुरका एसपी नवरत्न पौडेलले बाह्रखरीलाई जानकारी दिए । रेस्टुरेन्टमा विवाद हुँदा कमचारी भट्टले चक्कु प्रहार गरेको खुलेको उनले बताए । पक्राउ परेकामाथि थप अनुसन्धान जारी छ ।