काठमाडौं । सुदूरपश्चिम रोयल्सका कप्तान दीपेन्द्रसिंह ऐरीले नेपाल प्रिमियर लिग (एनपीएल)मा ओमोडा ई–५ पाएका छन् । प्रतियोगितामा सर्वोत्कृष्ट नेपाली खेलाडी बनेका दीपेन्द्रले ओमोडा एन्ड जेइकोका तर्फबाट ओमोडा ई–५ मोडेलको गाडी पाएका हुन् । नेपाली बजारमा यो गाडीको प्रतिमूल्य ६२ लाख रुपैयाँ कायम छ ।

सुदूरपश्चिम रोयल्सलाई फाइनलसम्म पुर्‍याउँदा उनले अलराउन्ड प्रदर्शन गर्दै नौ खेलमा २२७ रन र नौ विकेट लिए । फाइनलमा उनको टोली सुदूरपश्चिम जनकपुर बोल्ट्ससँग पाँच विकेटले पराजित भएको थियो ।

प्रतियोगिताको सर्वोत्कृष्ट खेलाडी भने सुदूरपश्चिमकै सैब जैब चुनिए । अलराउन्ड प्रदर्शन गरेका जैबले नगद पाँच लाख रुपैयाँ पुरस्कार पाए । उनले ब्याटिङतर्फ नौ खेलमा दुई अर्धशतकसहित २७५ रन बनाए । बलिङतर्फ १२ विकेट लिएका थिए ।

• सुदूरपश्चिमविरुद्ध पाँच विकेटको जितसहित जनकपुर बन्यो एनपीएल च्याम्पियन 

यस्तै, ‘इमर्जिङ प्लेयर अफ दी टुर्नामेन्ट’ विपीन शर्मा बने । कर्णाली याक्सका १६ वर्षे युवा बलर विपीनले ५० हजार रुपैयाँ पुरस्कार पाए ।

जनकपुरका ललितनारायण राजवंशी प्रतियोगिताको उत्कृष्ट बलर बने । उनले अल्ट्राभोयलेट एफ७७ मोडलको एउटा मोटरसाइकल प्राप्त गरे ।

थप तस्बिर हेर्नोस्–