काठमाडौं । प्रधानमन्त्री एवं नेकपा (एमाले)का अध्यक्ष केपी शर्मा ओलीले चिनियाँ कम्युनिस्ट पार्टी (सीपीसी)को दृष्टान्त दिँदै पार्टीले आफूलाई विकास गर्न नसकेको स्वीकार गरेका छन् ।

आइतबार च्यासलमा स्थानीय तहमा पार्टीका समस्या र समाधान विषयक राष्ट्रिय कार्यशालामा उनले चीन आर्थिक रूपमा महाशक्तिको हिसाबले अघि बढेको बताए । चीनले विकास, प्रविधिमा श्रेष्ठता हासिल गरेको उनले उल्लेख गरे ।

ओलीले चीनमा पार्टीका पक्षमा बोल्ने प्रवृत्ति रहेको बताए । “पार्टीको पक्षमा बोल्ने प्रवृत्ति छ । विरोधीका आक्रमण, हमलालाई कसरी पराजित गर्ने ? त्यसका निम्ति तरिका अवलम्बन गर्ने, अनुशासित ढंगले एकताबद्ध भएर चल्ने,” उनले भने ।

नेपालको जनसंख्याको तीन गुणा बढी पार्टी सदस्य त्यहाँ नेतृत्वको वरिपरि गोलबन्द रहेको उनले सुनाए । “एकजनाको वरिपरि फरक ओपनिएन आउँदैन । नेतृत्वको वरिपरि गोलबन्द छ । आफूलाई जे लाग्यो त्यही सही भनेर कुद्यो भने त्यसले पार्टीलाई एकताबाट प्रश्न उठाउँछ,” ओलीले भने ।

चीनले आफ्नै ढाँचाको समाजवादी प्रणाली स्थापना र विकास गरेको उनको भनाइ छ ।

अरू देशले स्थिरता र स्थायित्व दिएर अघि बढे पनि पार्टीले गर्नुपर्ने मात्रामा विकास गर्न नसकेको उनले उल्लेख गरे । “अरू पनि देश छन्, स्थिरिता, स्थायित्व कायम गरेर तीव्र आर्थिक विकास गरेका छन् । यस्तै उद्देश्यका लागि हाम्रो पार्टी पनि स्थापना भयो । हाम्रो पार्टीले जसरी विकास गर्नुपर्थ्यो त्यसरी गर्न सकेन,” ओलीले भने, “वैचारिक स्पष्टता जस्तो हुनुपर्थ्यो र त्यस स्पष्टतामा एकता जस्तो हुनुपर्थ्यो, त्यो भएन ।”

ओलीले तुलनात्मक रूपमा पुष्पलालले सही विचार लिएको बताए । केहीले भने भोटो फटाए पनि नेतृत्व दिन नसकेको उनको भनाइ थियो ।

“कोही विचारहीन अकडा कुरा गरेर बस्ने, भोटोचाहिँ फटाउने तर नेतृत्व दिन नसक्ने अवस्था रहे । विमति जनाउने तर सही बाटो के हो त्यो पहिल्याउन नसक्ने । असहमति राखेर आफूलाई कुछ हौँ भन्ने देखाउने प्रवृत्ति...,” उनले भने ।

प्रतिक्रियावादी शक्तिले अन्तरविरोध पैदा गरेर ‘टुक्याऊ र राज गर’ भन्ने नीति हुने गरेको उनले बताए ।