काठमाडौं । जनता समाजवादी पार्टी, नेपालले ‘जनतासँग जसपा नेपाल – संगठन निर्माण अभियान’लाई आउँदो माघ मसान्तसम्म जारी राख्ने निर्णय गरेको छ । शनिबार पार्टी केन्द्रीय कार्यालय बालकुमारीमा बसेको कार्यकारिणी समितिको बैठकबाट संगठन विस्तार अभियान प्रभावकारी रहेको निष्कर्ष निकाल्दै यसलाई माघ मसान्तसम्म निरन्तरता दिने निर्णय गरिएको हो ।

शुक्रबार सुरु उक्त बैठक शनिबार सकिएको छ । स्थानीय तह उपनिर्वाचनमा मधेस प्रदेशसहित जसपा नेपालले देशभरिबाट प्राप्त गरेको मत सन्तोषजनक रहे पनि पर्याप्त नरहेकाले संगठन निर्माण एवं विस्तार अभियानलाई अझ प्रभावकारी ढंगले अघि बढाउने निष्कर्ष बैठकबाट निकालिएको छ ।

यस्तै, महाधिवेशनपछि थपिएका क्रियाशील सदस्यता विवरण केन्द्रीय कार्यालयले आउँदो फागुन १५ गतेभित्र अद्यावधि गर्ने निर्णय गरिएको अध्यक्ष उपेन्द्र यादवको सचिवालयले जानकारी गराएको छ ।

जसपा नेपालले पार्टीका स्थानीय तह र प्रदेश अधिवेशन चैत महिनाभित्र सकाउने समेत निर्णय गरेको छ ।

आउँदो वैशाख २५ गतेभित्र पार्टीका सबै प्रदेश तथा राष्ट्रिय समितिहरूको अधिवेशन सम्पन्न गर्ने निर्णय गरिएको छ । तोकिएको समयभित्र अधिवेशन गर्न नसक्ने भ्रातृसंगठन स्वतः विघटन हुने समेत निर्णय गरिएको यादवको सचिवालयले जनाएको छ ।