काठमाडौं । राप्रपा नेपालका अध्यक्ष कमल थापाले जलस्राेतको विषयमा पर्याप्त राष्ट्रिय बहस नहुनु र साझा धारणा बन्न नसक्नु विडम्बना भएको बताएका छन् । आज शुक्रबार साे पार्टीद्वारा आयोजित 'नेपालमा जलस्राेतको चुनौती र समाधान' विषयक अन्तरक्रिया कार्यक्रममा बोल्दै थापाले कुनै एउटा मुलुकको स्वार्थपूर्तिका लागि मात्र नेपालको जलसम्पदा प्रयोग हुने विषय प्रधान हुन नसक्ने बताए । 

पूर्वऊर्जामन्त्री समेत रहेका थापाले दीर्घकालीन नीति तर्जुमा गर्न राज्य असफल भएकोमा चिन्ता व्यक्त गरे । जलसम्पदाको समुचित सदुपयोग गर्नका लागि नीति बन्न नसक्नु, सिँचाइको क्षेत्रलाई ओझेलमा पारिनु, राजनीतिक दलहरूमा यति धेरै महत्त्वपूर्ण इस्युमा बहसको न्यूनता रहनु, राष्ट्रिय हित र स्वार्थलाई प्राथमिकतामा राखेर अघि बढ्ने साहसिक र भिजनरी नेतृत्वको अभाव रहनुले पनि जलस्राेत क्षेत्रमा समस्या रहेको चर्चा गरे । 

कार्यक्रममा जलस्राेत विज्ञ तथा अख्तियार दुरुपयोग अनुसन्धान आयोगका पूर्व प्रमुख आयुक्त सूर्यनाथ उपाध्यायले चुनौती र समाधानबारे कार्यपत्र प्रस्तुत गरेका थिए । उपाध्यायले राजनीतीकरणको चपेटा र कमिसनको खेलले नेपालको जलस्राेत क्षेत्र तहसनहस भएको बताए । 

विदेशीको स्वार्थकेन्द्रित भएर नेपालका दलहरू सक्रिय हुनु मुलुकको स्वाभिमान र स्वाधीनताका लागि हितकर नभएको उनले चर्चा गरे । कार्यक्रममा पूर्वसचिव, विज्ञ, सञ्चारकर्मी र सरोकारवालाले उक्त कार्यपत्रमाथि टिप्पणीसहित आफ्नो धारणा राखेका थिए ।