काठमाडौं । भारतीय राष्ट्रिय कांग्रेस पार्टीले आउँदो दिल्ली विधानसभा निर्वाचनका निम्ति उमेदवारहरूको पहिलो सूची सार्वजनिक गरेको छ । उक्त सूचीमा सन्दीप दीक्षितको नाम पनि समावेश छ । उनलाई नयाँ दिल्ली विधानसभा सिटको टिकट दिइएको छ ।

टिकट पाएलगत्तै सन्दीप दीक्षितले भनेका छन्, “म अरविन्द केजरीवालको विरुद्धमा चुनाव लडिरहेकोले उहाँलाई प्रश्न गर्नु स्वाभाविक हो र उहाँलाई जवाफदेही बनाउनु । अरविन्द केजरीवालमा मेरो प्रश्नको सामना गर्ने हिम्मत छैन ।”

सन्दीपले कांग्रेसबिना दिल्लीको अर्को सरकार बन्न नसक्ने जिकिर गरेका छन् ।

दिल्लीका पूर्वमुख्यमन्त्री अरविन्द केजरीवाल नयाँ दिल्लीबाट वर्तमान विधायक हुन् । केजरीवालले यो सिट शीला दीक्षितबाट खोसेका थिए । शीला मुख्यमन्त्री हुँदा केजरीवालसँग चुनाव हारेकी थिइन् ।

सन्दीप लोकसभा सांसद पनि भइसकेका छन् । उनी शीला दीक्षितका छोरा हुन् । उनी आम आदमी पार्टी र कांग्रेसबीचको गठबन्धनका विरोधी पनि हुन् । बीबीसी हिन्दीबाट ।