काठमाडौं । नेकपा (एकीकृत समाजवादी)को स्थायी कमिटीमा सदस्य विस्तार गरिने भएको छ । बुधबार आलोकनगरमा बसेको स्थायी कमिटी बैठकले दशौँ महाधिवेशनअघि सोही कमिटीमा रहेका १७ नेतालाई थप गर्ने निर्णय गरेको एक नेताले जानकारी दिए ।

उक्त निर्णय भए पनि औपचारिक रूपमा सार्वजनिक भने भएको छैन । निर्णयप्रति उपमहासचिव राजेन्द्र राईले फरक मत राखेका छन् । यसअघि स्थायी कमिटीमा पदाधिकारी मात्रै रहने निर्णय भएको थियो । विधानविपरीत सदस्य विस्तार गर्न नहुने भन्दै राईले फरक मत राखेका हुन् ।

“महाधिवेशनबाट पारित भएको विधानमा पोलिट्ब्युरोको एकतिहाइ स्थायी कमिटी रहने भनिएको छ । पोलिट्ब्युरो १०८ जनाको छ । स्थायी कमिटीमा १७ जना थप्दा ४१ जनाको हुन जान्छ । त्यो पोलिट्ब्युरोको एकतिहाइभन्दा बढी हो । विधानसंवत् हुँदैन,” राईले बैठकमा भने ।

उनले विधान नै नआई कतिजना थप्ने ? भन्दै प्रश्न गरेको स्रोतले जानकारी दिएको छ । राईले स्थायी कमिटी, पोलिट्ब्युरोमा सदस्य थप गर्न केन्द्रीय समितिले मात्रै सक्ने विषय उठाए । “पोलिट्ब्युरो र स्थायी कमिटी केन्द्रीय कमिटीले नै गर्न सक्छ । स्थायी कमिटीले स्थायी कमिटीमा कसरी थप गर्न सक्छ ?,” राईको प्रश्न थियो ।

राईले स्थायी कमिटीमा सदस्य थप गर्दा तुलबहादुर गुरुङ लगायतका नेताहरूको नाम छुटाउन नहुने समेत धारणा राखेको स्रोतले जनाएको छ । स्थायी कमिटीमा थप गरिएका १७ नेतासहितको बैठक शुक्रबार बस्ने तयारी भएको छ ।

“आज निर्णय सार्वजनिक नगर्ने, शुक्रबार थपिएका नेताहरूसहितको बैठक बस्ने निर्णय गरिएको छ,” एक पदाधिकारीले भने ।

स्थायी कमिटीको बैठकबाट नेताहरूको कार्यविभाजन गर्ने तयारी छ । तर, आजको बैठकमा कार्यविभाजनको ड्राफ्ट पनि नबाँडिएको र थपिएका नेताहरूसहितको बैठकबाट नै निर्णय गर्ने जनाइएको छ ।

गत असारमा राष्ट्रिय महाधिवेशन गरेको पार्टीले हालसम्म नेताहरूको जिम्मेवारी हेरफेर तथा कार्यविभाजनअन्तर्गत विभिन्न विभागीय प्रमुख, जिल्ला इन्चार्ज, आयोग तथा जनसंगठन इन्चार्ज तोकेको छैन । नेताहरूले दाबी नछाड्दा जिम्मेवारी दिन सकस भएको छ ।