काठमाडौं । नेपाल प्रिमियर लिग (एनपीएल)मा काठमाडौं गुर्खाजले लुम्बिनी लायन्सविरुद्ध १८ रनको जित निकालेको छ । काठमाडौंसँग पराजित भएसँगै लुम्बिनी एनपीएल–२०२४ को प्लेअफ दौडबाट बाहिरिने पहिलो टिम बनेको छ ।

बुधबार कीर्तिपुरस्थित त्रिवि क्रिकेट मैदानमा सम्पन्न खेलमा काठमाडौंले प्रस्तुत गरेको १०४ रनको लक्ष्य पछ्याउने क्रममा काठमाडौंले १९.२ ओभरमा सबै विकेट गुमाएर ८५ रनमात्र बनाउन सक्यो ।

प्रतियोगितामा काठमाडौंको यो दोस्रो जित हो । काठमाडौंले आफ्नो पहिलो खेलमा चितवन राइनोजसँग पाँच विकेटको हार बेहोरेको थियो । दोस्रो खेलमा कर्णाली याक्सविरुद्ध तीन विकेटको जित निकालेको काठमाडौंले तेस्रो खेलमा भने सुदूपश्चिम रोयल्सविरुद्ध ७३ रनको हार बेहोरेको थियो ।

काठमाडौंविरुद्ध लुम्बिनीका सन्दीप जोराले सर्वाधिक २६ रन बनाए । उनले २९ बलमा दुई चौका प्रहार गरे । 

उन्मुक्त चन्दले १९ बलमा एक चौकासहित १९ रन थपे । सूर्य तामाङले अविजित रन जोडे । लुम्बिनीका अन्य ब्याटर भने दोहोरो अंकसम्म पुग्न सकेनन् ।

लुम्बिनीका कप्तान रोहितकुमार पौडेल आठ रनमा पभेलियन फर्किए । यस्तै, ओपनर आशुतोष घिरैया चार, अर्जुन साउद तीन, टम मुरेस ६ र विवेक यादव दुई रनमा पभेलियन फर्किए । 

लुम्बिनीका साद बिन जफर ‘गोल्डेन डक’ भए । रेमोन सिमोन्ड्स ‘डक’ भए ।

लुम्बिनीलाई सस्तैमा समेट्न काठमाडौंका कप्तान करण केसीले चार विकेट लिए । चार ओभर बलिङ गरेको करणले १६ रनमात्र खर्चिए । दीपेश कँडेलले तीन विकेट लिए । निकै इकोनोमिक स्पेलमा दिपेशले चार ओभर बलिङ गर्दा ६ रनमात्र खर्चिए । गेरहार्ड इरास्मसको नाममा दुई विकेट रह्यो । राशिद खानले एक विकेट हात पारे ।

त्यसअघि टस जितेर ब्याटिङमा आएको काठमाडौंले १९.२ ओभरमा सबै विकेट गुमाएर १०२ रनको योगफल खडा गरेको थियो । 

काठमाडौंका भीम सार्कीले सर्वाधिक ३१ रन बनाए । उनले ४० बलमा एक चौका प्रहार गरे । डान डाउथवेटले २४ बलमा दुई छक्कासहित २१ थपे । प्रतीक श्रेष्ठले १४ बलमा दुई छक्कासहित २० र स्टेफन एस्किनाजीले १६ बलमा दुई चौकासहित १३ रन जोडे ।

यसबाहेक, काठमाडौंका अन्य ब्याटरले दोहोरो अंकमा रन जोड्न सकेनन् ।

काठमाडौंविरुद्ध लुम्बिनीका साद बिन जफरले तीन विकेट लिए । चार ओभर बलिङ गरेका जफरले २१ रन खर्चिए । रेमोन सिमोन्ड्स र अभिषेक गौतमले समान दुई विकेट लिए । सूर्य तामाङ र विवेक यादवको नाममा समान एक विकेट रह्यो । 

जितसँगै चार अंक जोडेको काठमाडौं तालिकाको पाँचौँ स्थानमा उक्लिएको छ । काठमाडौंले चार खेलबाट चार अंक जोडेको छ ।

प्रतियोगितामा छैटौँ खेल खेलेको लुम्बिनीको यो पाँचौँ हार हो । लुम्बिनीले पहिलो खेलमा विराटनगर किंग्सविरुद्ध दुई विकेटको, दोस्रो खेलमा पोखरा एभेन्जर्सविरुद्ध १० विकेटको, तेस्रो खेलमा सुदूरपश्चिम रोयल्ससँग ४५ रनको र चौथो खेलमा जनकपुर बोल्ट्ससँग एक रनको साँघुरो हार बेहोरेको थियो । पाँचौँ खेलमा भने लुम्बिनीले चितवन राइनोजविरुद्ध ३३ रनको जित निकालेको थियो ।