काठमाडौं । निर्देशक अर्जुन सुवेदीले नयाँ चलचित्र ‘सोल्टिनी’ घोषणा गरेका छन् । सोमबार सार्वजनिक गरिएको अनाउन्समेन्ट भिडियोमार्फत चलचित्रका प्रमुख पात्र र विषयवस्तु प्रस्तुत गर्दै यस चलचित्र निर्माणको औपचारिक घोषणा गरिएको हो ।

भिडियोमा साइग्रेस पोखरेलले भनेका छन्, “मानिसबाट मानिसलाई हुने छि छि दुरदुर, अमानवता र जातीय भेदभाव मेटाउन कसैले त कलमअगाडि बढाउनै पर्छ । कि त पैताला जलाउनै पर्छ ।” चलचित्रले समाजमा विद्यमान जातीय विभेदलाई उजागर गर्दै यसविरुद्ध आवाज उठाउने कथा प्रस्तुत गर्ने संकेत गरेको छ ।

चलचित्रमा प्रकाश सपूत र परीक्षा लिम्बूलाई प्रमुख भूमिकामा प्रस्तुत गरिएको छ । अभिनेता सपूतले ‘भीमसेन पोखरेल’को भूमिका निर्वाह गर्दै भनेका छन्, “सोल्टिनी आयौ, अन्तिम पटक भेट्ने मौका दियौ । तिम्रो अनुहार हेर्न नपाई डोली चढ्छौ जस्तो लागेको थियो ।”

अभिनेत्री लिम्बूले ‘दिलासा राई’को भूमिका निभाउँदै भनेकी छन्, “सोल्टी, म तपाईंलाई एकदमै माया गर्छु, यति धेरै की तपाईँले सोच्न पनि सक्नुहुन्न । तर हामी एक हुन सक्दैनौँ ।”

चलचित्रको कथा भोजपुरको कुनै गाउँमा आधारित रहेको निर्माणपक्षले जारी गरेको प्रेस नोटमा उल्लेख छ । 

चलचित्र पुस १५ बाट छायांकनमा जानेछ । चलचित्र घोषणासँगै रिलिज मिति पनि २०८२ सालको असोज ३ गते संविधान दिवसको दिनलाई तोकिएको छ ।