काठमाडौं । नेपाल प्रिमियर लिग (एनपीएल) खेलकुद क्षेत्रकै सबैभन्दा चर्चित खेल इभेन्ट बनेको छ । यही मंसिर १५ गतेदेखि सुरु प्रतियोगितामा हालसम्म १५ खेल समाप्त भइसकेको छ । यसक्रममा कुल १५ अर्धशतक र एक शतक बनेको छ । १४ ब्याटरले अर्धशतक र एकले शतक बनाएका छन् ।

आउँदो पुस ६ गतेसम्म सञ्चालन हुने प्रतियोगितामा सोमबार कुनै खेल छैन । हालसम्म अपराजित जनकपुर चार खेलबाट आठ अंकसहित तालिकाको शीर्ष स्थानमा छ । पुछारमा रहेको लुम्बिनी जितविहीन छ । चार खेल खेल्दा पनि लुम्बिनीले अंकको खाता खोल्न सकेको छैन ।

शतक र अर्धशतक बनाउने खेलाडी

आन्द्रियस गौस (पोखरा एभेन्जर्सविरुद्ध लुम्बिनी लायन्स)
एनपीएलमा पहिलो शतक बनाउने ब्याटर हुन्, पोखरा एभेन्जर्सका आन्द्रियस गौस । गौसले लुम्बिनी लायन्सविरुद्ध १७१ रनको लक्ष्य पछ्याउने क्रममा पोखराबाट ५४ बलमा १०० रन बनाएका थिए ।

पोखराको जितमा अविजित इनिङ खेलेका गौसले ५५ बलमा १२ चौका र पाँच छक्कासहित १०४ रन बनाएका थिए । गौसकै शतकमा पोखराले लुम्बिनीविरुद्ध १० विकेटको सानदार जित निकालेको थियो । एनपीएलमा विकेटका आधारमा कुनै पनि टिमले निकालेको यो हालसम्मकै ठूलो जित हो ।

मार्टिन गप्टिल (विराटनगर किंग्सविरुद्ध जनकपुर बोल्ट्स)
प्रतियोगिताको उद्घाटन खेलमा विराटनगर किंग्सका ओपनर मार्टिन गप्टिलले जनकपुर बोल्ट्सविरुद्ध अर्धशतक बनाएका थिए । गप्टिल प्रतियोगितामा अर्धशतक बनाउने पहिलो ब्याटर समेत बने । उनले जनकपुरविरुद्ध ४३ बलमा सात चौका र एक छक्कासहित ५५ रनको इनिङ खेलेका थिए ।

लहिरु मिलान्था (जनकपुर बोल्ट्सविरुद्ध विराटनगर)
प्रतियोगिताको उद्घाटन खेलमै विराटनगरविरुद्ध पनि जनकपुरका ब्याटर लहिरु मिलान्थाले अर्धशतक बनाएका थिए । जनकपुरले आठ विकेटको सहज जित निकाल्दा मिलान्थाले अविजित ७५ रन बनाएका थिए । यसक्रममा उनले ५३ बल खेल्दै नौ चौका र तीन छक्का प्रहार गरे ।

अनिल साह (जनकपुर बोल्ट्सविरुद्ध कर्णाली याक्स)
प्रतियोगितामा लगातार दोस्रो जित निकाल्ने क्रममा जनकपुरले कर्णाली याक्सलाई आठ विकेटले हरायो । यस जितमा जनकपुरका कप्तान समेत रहेका अनिल साहले अर्धशतकीय इनिङ खेले । कर्णालीले दिएको १४२ रनको लक्ष्य पछ्याउने क्रममा अनिलले अविजित ६२ रन बनाए । उनले यसक्रममा ४२ बल खेल्दै ६ चौका र तीन छक्का प्रहार गरे ।

दीपेन्द्रसिंह ऐरी (सुदूरपश्चिम रोयल्सविरुद्ध विराटनगर किंग्स)
सुदूरपश्चिम रोयल्सका कप्तान दीपेन्द्रसिंह ऐरी प्रतियोगितामा अर्धशतक बनाउने चौथो ब्याटर हुन् । उनले विराटनगरविरुद्ध अविजित ५७ रन बनाएका थिए । खेलमा सुदूरपश्चिमले ९० रनको सहज जित निकाल्दा दीपेन्द्रले आक्रामक ब्याटिङ गर्दै २४ बलमा तीन चौका र पाँच छक्कासहित ५७ रन जोडे । 

रवि बोपारा (चितवन राइनोजविरुद्ध पोखरा एभेन्जर्स) 
चितवन राइनोजका मध्यक्रम ब्याटर रवि बोपाराले प्रतियोगिताको पाँचौँ खेलमा पोखरा एभेन्जर्सविरुद्ध अर्धशतक बनाएका थिए । पोखराविरुद्ध चितवनले १६१ रनको योगफल खडा गर्दा उनले ५१ रन बनाएका थिए । रविले यसक्रममा ३८ बल खेल्दा तीन चौका र तीन छक्का प्रहार गरे ।

शिखर धवन (कर्णाली याक्सविरुद्ध काठमाडौं गुर्खाज)
एनपीएलमा अर्धशतक बनाउने पाँचौँ ब्याटर बनेका शिखर धवनले काठमाडौं गुर्खाजविरुद्ध अविजित ७२ रन बनाएका थिए । कर्णालीका ओपनर ब्याटर धवनले ५१ बल खेल्दै चार चौका र पाँच छक्का प्रहार गरेका थिए । धवनको अर्धशतकमा काठमाडौंविरुद्ध कर्णालीले १४९ रनको योगफल खडा गरेको थियो ।

तर, दोस्रो इनिङमा ब्याटिङका निम्ति ओर्लिएको काठमाडौंले उक्त लक्ष्य १९.३ ओभरमा सात विकेट गुमाएर पूरा गरेको थियो । कर्णालीबाट चार खेल खेल्दै स्वदेश फर्किइसकेका धवनको प्रतियोगितामा यो ए कमात्र अर्धशतक हो ।

ब्रान्डन म्याकमुलम (सुदूरपश्चिम रोयल्सविरुद्ध काठमाडौं गुर्खाज)
सुदूरपश्चिमबाट तेस्रो नम्बरमा ब्याटिङका निम्ति ओर्लिएका ब्रान्डन म्याकमुलमले काठमाडौंविरुद्ध ५४ रन बनाएका थिए । यसक्रममा म्याकमुलमले ३६ बलमा तीन चौका र चार छक्का प्रहार गरे ।

रवि बोपारा (चितवन राइनोजविरुद्ध कर्णाली याक्स)
एनपीएलमा दुई अर्धशतक बनाउने पहिलो ब्याटर बनेका रवि बोपाराले प्रतियोगिताको १०औँ खेलमा कर्णाली याक्सविरुद्ध अर्धशतकीय इनिङ खेलेका थिए । बोपाराले कर्णालीविरुद्ध अविजित ५९ रन बनाएका थिए । यसक्रममा उनले ४० बलमा सात चौका र एक छक्का प्रहार गरे ।

रोहितकुमार पौडेल (लुम्बिनी लायन्सविरुद्ध पोखरा एभेन्जर्स)
प्रतियोगिताको ११औँ खेलमा पोखराविरुद्ध शतकबाट पाँच रनले चुकेका लुम्बिनी लायन्सका रोहितकुमार पौडेलले ९५ रन बनाएका थिए । यसक्रममा उनले ५९ बलमा १० चौका र चार छक्का प्रहार गरे । रोहितको अर्धशतकमा लुम्बिनीले पोखराविरुद्ध १७० रनको योगफल खडा गरेको थियो । तर, पोखराले यो लक्ष्य १६.५ ओभरमा विकेट नगुमाई भेट्टाएको थियो ।

दिनेश खरेल (पोखरा एभेन्जर्सविरुद्ध लुम्बिनी लायन्स)
लुम्बिनीविरुद्ध १० विकेटको जित निकाल्दा पोखराका ओपनर गौसले शतक बनाए । अर्का ओपनर दिनेश खरेलले पनि अर्धशतकीय इनिङ खेलेका थिए । खरेलले लुम्बिनीविरुद्ध अविजित ६१ रन बनाए । ४६ बल खेलेका दिनेशले चार चौका र चार छक्का प्रहार गरे ।

सैब जैब (सुदूरपश्चिम रोयल्सविरुद्ध लुम्बिनी लायन्स)
प्रतियोगिताको १२औँ खेलमा सुदूरपश्चिमका ओनपर ब्याटर सैब जैबले लुम्बिनीरिुद्ध ९० रन बनाएका थिए । शतकबाट १० रनले चुकेका जैबले ६१ बलमा ६ चौका र पाँच छक्का प्रहार गरे । 

विवेक यादव (लुम्बिनी लायन्सविरुद्ध सुदूरपश्चिम रोयल्स)
सुदूरपश्चिमविरुद्ध १८८ रनको लक्ष्य पछ्याउने क्रममा लुम्बिनीका अलराउन्डर विवेकले ७७ रन बनाएका थिए । यसक्रममा विवेकले ५४ बलमा तीन चौका र सात छक्का प्रहार गरे । प्रतियोगितामा हालसम्म विवेक एकै इनिङमा सबैभन्दा धेरै छक्का प्रहार गर्ने ब्याटर समेत हुन् । विवेकको अर्धशतकका बाबजुद लुम्बिनी ४५ रनले पराजित भएको थियो ।

विलियम बोसिस्टो (कर्णाली याक्सविरुद्ध विराटनगर किंग्स)
प्रतियोगिताको १३औँ खेलमा विराटनगविरुद्ध कर्णालीले १३३ रनको योगफल बनाउँदा मध्यक्रम ब्याटर विलियम बोसिस्टोे ६६ रन बनाएका थिए । उनले ४९ बल खेल्दा पाँच चौका र तीन छक्का प्रहार गरे ।

देव खनाल (कर्णाली याक्सविरुद्ध विराटनगर किंग्स)
विराटनगरविरुद्धको उक्त खेलमा विलियम बोसिस्टोसँगै कर्णालीका ओपनर देव खनालले पनि अर्धशतक बनाएका थिए । विराटनगरविरुद्ध देवले ५३ रन बनाएका थिए । यसक्रममा देवले ४८ बलमा चार चौका र दुई छक्का प्रहार गरे ।

हसन एसाखिल (चितवन राइनोजविरुद्ध सुदूरपश्चिम रोयल्स)
प्रतियोगिताको १५औँ खेलमा चितवनका ओपनर हसन एसाखिलले सुदूरपश्चिमविरुद्ध अर्धशतक बनाए । योसँगै हसन एनपीएलमा अर्धशतक बनाउने १४औँ ब्याटर बने । उनले सुदूरपश्चिविरुद्ध ६५ रन बनाएका थिए । यसक्रममा एसाखिलले ५२ बलमा ६ चौका र तीन छक्का प्रहार गरे ।