काठमाडौं । कोसी प्रदेशका पूर्वमन्त्री लीलाबल्लभ अधिकारीका विषयमा दरपिठविरुद्धको निवेदन सर्वोच्च अदालतका न्यायाधीश कुमार चुडालको इजलासमा परेको छ । यही मंसिर १० मा सरकारी वकिल कार्यालय काठमाडौंले मुद्दा नचलाउने निर्णय गरेर अधिकारी थुनामुक्त भएका थिए । उक्त निर्णय बदरको माग राख्दै वरिष्ठ अधिवक्ता दिनेश त्रिपाठीले रिट दायर गरेका थिए । 

सर्वोच्चका रजिस्ट्रार भद्रकाली पोखरेलले मुद्दा चलाउने वा नचलाउने अधिकार महान्यायाधिवक्ताले जिल्ला सरकारी वकिललाई प्रत्यायोजन गरेको भन्दै त्यसविरुद्ध रिट अघि नबढ्नेगरी दरपिठ गरिदिएका थिए । उक्त दरपिठविरुद्ध वरिष्ठ अधिवक्ता त्रिपाठीले निवेदन दर्ता गराएका थिए । 

जिल्ला सरकारी वकिल कार्यालय काठमाडौंले पैसा तिरेर जापान जानेहरूलाई पक्राउ गरेर अनुसन्धानका लागि थुनामा राखेकामा उनीहरूलाई लिएर गएको आरोप लागेका मन्त्रीलाई भने मुद्दा नचलाउने निर्णय गरेको थियो । जिल्ला सरकारी वकिलको निर्णय बदर गरी अधिकारीलाई अनुसन्धानको दायरामा राख्न वरिष्ठ अधिवक्ता त्रिपाठीको माग छ । 

उनको रिट अदालतका रजिस्ट्रार भद्रकाली पोखरेलले प्रक्रियामा लग्न नपर्ने भन्दै दरपिठ गरिदिएका थिए । दरपिठविरुद्ध त्रिपाठीले लगेको निवेदन सर्वोच्चमा बिहीबार दर्ता भएको हो । उनको निवेदनमा आज सुनुवाइ हुन लागेको हो । सुनुवाइपछि इजलासले दरपिठ सदर गरे रिटको प्रक्रिया समाप्त हुन्छ ।

दरपिठ खारेज भएमा सर्वोच्चले सरकारी वकिलको निर्णयमा सुनुवाइ गरी न्यायिक परीक्षण गर्नेछ । सुनुवाइको प्रक्रियामा गएर न्यायालयले मुद्दा फिर्ताको निर्णय बदर गरे अधिकारीलाई पुनः पक्राउ गरी अनुसन्धान अघि बढ्नेछ । जिल्ला सरकारी वकिलको कार्यालय काठमाडौंले अधिकारीविरुद्ध मुद्दा नचलाउने निर्णय गरेपछि उनी मंसिर १० गते रिहा भएका थिए ।