काठमाडौं । आउँदो आइतबार (भोलि) राति र सोमबार (पर्सि) देशका धेरै स्थानमा वर्षा हुने सम्भावना छ । केही स्थानमा मध्यमसम्म वर्षाको सम्भावना रहेको मौसम पूर्वानुमान महाशाखाले जनाएको छ ।

उक्त अवधिमा देशभर बदली (आकाशमा बादल) र केही स्थानमा वर्षा/हिमपात हुने महाशाखाका मौसमविद् मीनकुमार अर्यालले बताए । पश्चिमी वायुको प्रणालीले यो वर्षको हिउँदको पहिलो वर्षा गराउने उनले जानकारी दिए ।

“बदली त देशभरि नै हुनेछ, विशेष गरी पश्चिमी क्षेत्रमा बढी प्रभाव पर्नेछ,” उनले बाह्रखरीसित भने, “सुदूरपश्चिम, कर्णाली, लुम्बिनी प्रदेशमा हल्कादेखि मध्यमसम्म वर्षा हुनसक्छ ।”

यसबाहेक अरू केही क्षेत्रमा बदली र हल्कासम्म वर्षा हुन सक्ने उनले बताए । हिमाली र उच्च पहाडी भूभागमा हिमपातको सम्भावना रहेको उनले जानकारी दिए ।

उनका अनुसार, हाल भित्रन लागेको उक्त मौसमी प्रणाली लामो समय यहाँ रहँदैन । पश्चिमी क्षेत्रबाट प्रवेश गरेर त्यो छोटो अवधिमै पूर्व हुँदै बाहिरिनेछ ।

“लामो सिस्टम (प्रणाली) छैन । आइतबार (भोलि) रातितिर प्रवेश गरेर सोमबार (पर्सि) अपराह्नतिर बाहिरिनेजस्तो देखिन्छ,” उनले भने ।

मौसमविद् अर्याल यसलाई ‘एकदिने प्रणाली, दुई दिन प्रभाव’ भन्छन् । अर्थात्, आइतबार र सोमबार त्यसको प्रभाव पर्छ, तर त्यो एक दिन समयजतिको हुन्छ ।

“मंगलबारदेखि त क्लियर (मौसम सफा) नै हुन्छ,” उनले भने, “सोमबार बेलुका–रातिसम्म त्यसको असर अलिअलि रहला ।”

उक्त अवधिमा काठमाडौंमा बदली हुन्छ । हल्का वर्षा पनि हुन सक्ने उनले बताए । तर, काठमाडौंमा वर्षाको मजबुत सम्भावना नरहेको उनले स्पष्ट पारे ।

“जाडो भने जगाउँछ,” उनले भने, “त्यसको प्रभावले चिसो बढ्ने हुन्छ ।”

मधेस र कोसी प्रदेशका तराई भूभागमा बदली हुने तर वर्षाको सम्भावना न्यून देखिएको उनले बताए ।

यसबारे महाशाखाले विशेष बुलेटिन पनि जारी गरिसकेको छ ।

महाशाखाले शनिबार बेलुका जारी गरेको मौसम पूर्वानुमान बुलेटिन पढ्नोस्–

हाल देशमा पश्चिमी वायुको आंशिक प्रभाव रहेको छ।

हाल मौसमको अवस्था (Present Weather Status):

हाल देशका पहाडी भू-भागमा आंशिक बदली रही बाँकी भू-भागमा आंशीक बदली देखी मौसम मुख्यतया सफा रहेको छ ।

२०८१ मंसिर २२ गते (शनिबार)

रातीː देशको पहाडी भू-भागमा आंशिक बदली रही बाँकी भू-भागमा मौसम मुख्यतया सफा रहने छ । कोशी प्रदेश र गण्डकी प्रदेशका उच्च पहाडी तथा हिमाली भू-भागको एक-दुई स्थानमा हल्का वर्षा/हिमपातको सम्भावना रहेको छ । 

२०८१ मंसिर २३ गते (आइतबार)

दिउँसोːकोशी प्रदेश लगायत देशको पहाडी भू-भागमा आंशिक बदली रही बाँकी भू-भागमा आंशिक बदली देखि मौसम मुख्यतया सफा रहने छ । कोशी प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशका उच्च पहाडी तथा हिमाली भू-भागको एक-दुई स्थानमा हल्का वर्षा/हिमपातको सम्भावना रहेको छ । 

रातीː सुदूरपश्चिम प्रदेश, कर्णाली प्रदेश र लुम्बिनी प्रदेश लगायत गण्डकी प्रदेशको पहाडी भू-भागमा साधारणतया देखि पूर्णतया बदली रही बाँकी भू‍-भागमा आंशिक देखि साधारणतया बदली रहने छ । सुदूरपश्चिम प्रदेश, कर्णाली प्रदेश र लुम्बिनी प्रदेशका केही स्थानहरुमा हल्का देखि मध्यम वर्षा, गण्डकी प्रदेशका थोरै स्थानहरु तथा  बागमती प्रदेश र कोशी प्रदेशका पहाडी भू-भागका एक-दुई स्थानमा हल्का वर्षाको सम्भावना रहेको छ। सुदूरपश्चिम प्रदेश र कर्णाली प्रदेशका उच्च पहाडी तथा हिमाली भू-भागका धेरै स्थानहरूमा, गण्डकी प्रदेशका उच्च पहाडी तथा हिमाली भू-भागका थोरै स्थानहरूमा तथा बागमती प्रदेश र कोशी प्रदेशका उच्च पहाडी तथा हिमाली भू-भागका एक-दुई स्थानमा हल्का देखि मध्यम हिमपात हुने सम्भावना रहेको छ।

२०८१ मंसिर २४ गते (सोमबार)

दिउँसोːसुदूरपश्चिम प्रदेश, कर्णाली प्रदेश लगायत बाँकी प्रदेशका पहाडी भू-भागमा साधारणतया देखि पूर्णतया बदली रही बाँकी भू‍-भागमा आंशिक देखि साधारणतया बदली रहने छ । सुदूरपश्चिम प्रदेश, कर्णाली प्रदेश र लुम्बिनी प्रदेशका केही स्थानहरुमा हल्का देखि मध्यम वर्षा, गण्डकी प्रदेश र बागमती प्रदेशका थोरै स्थानहरु तथा कोशी प्रदेशको पहाडी भू-भागका एक-दुई स्थानमा हल्का वर्षाको सम्भावना रहेको छ। सुदूरपश्चिम प्रदेश र कर्णाली प्रदेशका उच्च पहाडी तथा हिमाली भू-भागका धेरै स्थानहरूमा तथा  गण्डकी प्रदेश, बागमती प्रदेश र कोशी प्रदेशका उच्च पहाडी तथा हिमाली भू-भागका थोरै स्थानहरूमा हल्का देखि मध्यम हिमपात हुने सम्भावना रहेको छ।

रातीː कर्णाली प्रदेश लगायत सुदूरपश्चिम प्रदेश,गण्डकी प्रदेश, बागमती प्रदेश र कोशी प्रदेशका पहाडी भू-भागमा आंशिक बदली देखी साधारणतया बदली रही बाँकी भू-भागमा आंशिक बदली देखी मौसम मुख्यतया सफा रहेको छ। सुदूरपश्चिम प्रदेश, कर्णाली प्रदेश,गण्डकी प्रदेश र बागमती प्रदेशका पहाडी भू‍-भागका थोरै स्थानहरु हल्का वर्षाको सम्भावना रहेको छ। सुदूरपश्चिम प्रदेश,कर्णाली प्रदेश र गण्डकी प्रदेशका उच्च पहाडी तथा हिमाली भू-भागका केही स्थानहरूमा तथा बागमती प्रदेश र कोशी प्रदेशका उच्च पहाडी तथा हिमाली भू-भागका थोरै स्थानहरूमा हल्का देखि मध्यम हिमपात हुने सम्भावना रहेको छ।

आगामी २४ घण्टाका लागि चेतावनी तथा परामर्श (Warning/Advisory for next 24 hours):

कोशी प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशका उच्च पहाडी तथा हिमाली भू-भागको एक-दुई स्थानमा हल्का वर्षा/हिमपातको सम्भावना रहेको र बिहानको समयमा तराई तथा उपत्यका  धेरै स्थानहरूमा हुस्सु साथै थोरै स्थानहरुमा कुहिरोको सम्भावना रहेकोले दैनिक जनजिवन, यातायात तथा हवाई उड्डयनमा क्षणिक/आंशिक असर पर्न सक्ने हुनाले आवश्यक सतर्कता अपनाउनु हुन अनुरोध छ ।