विराटनगर । नेपाली कांग्रेसका नेता डा. शेखर कोइराला पक्षको भेलामा सहभागी हुन आएका पार्टीका पालिका सभापतिहरूले मोरङको बेलबारीमा पदयात्रा गरेका छन् । मंगलबार इलाम, ताप्लेजुङ, भोजपुरलगायत जिल्लाका सभापतिले बेलबारीको बेतनादेखि लोहन्द्रासम्म पदयात्रा गरेका हुन् ।

बेलबारी हुँदै उनीहरू विराटनगर आउनेछन् । कार्यक्रम विराटनगरको जैन भवनमा दिउँसो १ बजे सुरु हुँदै छ । कार्यक्रमको सबै तयारी पूरा भएको आयोजक नेपाली कांग्रेस विराटनगर महानगर समितिका सभापति दीपक चापागाईंले बताए ।

यही मंसिर २२ गते कांग्रेस कोसी प्रदेश समितिको भेला विराटनगरमै आयोजना गरिँदै छ । त्यो कार्यक्रममा कांग्रेस सभापति शेरबहादुर देउवा प्रमुख अतिथि हुनेछन् ।

कांग्रेस केन्द्रीय कार्यालयले भने जिल्ला समितिका नाममा पत्र पठाएर मंगलबारको कार्यक्रम पार्टीको आधिकारिक नभएकाले सहभागी नहुन भनेको छ ।