काठमाडौं । राष्ट्रिय स्वतन्त्र पार्टी (रास्वपा)ले स्थानीयमा खाता खोलेको छ । काठमाडौं महानगरपालिका वडा–१६ को अध्यक्ष पदमा रास्वपा निर्वाचित भएको हो । 

आइतबार भएको निर्वाचनको परिणाम सोमबार बिहान सार्वजनिक भएको हो । जसअनुसार वडा नम्बर १६ को अध्यक्षमा रास्वपाकी रोजिना श्रेष्ठ १ हजार ५८४ मत ल्याएर निर्वाचित भएकी हुन् ।  नेपाली कांग्रेसका देवेन्द्र पाठक २८० मतान्तरले पराजित भए ।  कांग्रेसका पाठकले १ हजार ३०४ मत पाए ।

नेकपा एमाले तेस्रो भएको छ । लक्ष्मीरत्न तुलाधरले १ हजार २१८ मत ल्याएको निर्वाचन आयोगले जनाएको छ । 

एकीकृत समाजवादीका मीनबहादुर मानन्धरले ६५१, राप्रपाका श्यामकृष्ण श्रेष्ठले ६२२ मत पाएका छन् । 

उपनिर्वाचनमा रास्वापाले २७ स्थानमा उमेदवार उठाएको छ । मतगणना भइरहेका अन्यत्र स्थानमा भने रास्वपाको उपस्थिति खासै देखिएको छैन । ०७९ को स्थानीय तहको निर्वाचन हुँदा रास्वापाको स्थापना भइसकेको थिएन । उपनिर्वाचनमा रास्वपाले दलहरुको यसअघिको विरासत तोडेको छ । 

कांग्रेसले गुमायो, तुलाधर फेरि पराजित
०७९ को निर्वाचनमा काठमाडौं–१६ मा कांग्रेसका मुकुन्द रिजाल निर्वाचित भएका थिए । ०७४ को निर्वाचनमा पनि रिजाल नै निर्वाचित भएका थिए ।

वडाध्यक्षमा निर्वाचित मुकुन्द रिजालको ०८० भदौ २१ गते निधन भएपछि रिक्त स्थानमा उपनिर्वाचन भएको थियो । 
०७९ को निर्वाचनमा रिजालले चार हजार १९ मत पाएका थिए । निकटतम प्रतिस्पर्धी एमालेका लक्ष्मीरत्न तुलाधरले तीन हजार ३१० मत ल्याएका थिए । उनी उपनिर्वाचनमा पनि पराजित भएका छन् । 

एकीकृत समाजवादीका लक्ष्मण गमालले एक हजार ५८९, राप्रपाकी विन्दिका गुरुङले ५५७ मत पाएका थिए । स्वतन्त्र उमेदवार शान्जे गुरुङले ३२२, अर्जुन थापा क्षेत्रीले २१६, नेमकिपाका श्रीराम महर्जनले ३२, अर्का स्वतन्त्र वसन्तराज भेटुवालले १९ र स्वतन्त्र रामशरण पौडेलले ६ मत प्राप्त गरेको निर्वाचन आयोगको तथ्यांक छ ।